Sa kasaysayan karon (Septiyembre 6)

Taktikang gerilya sa KKK

1897 – Miproklamar si Gen. Emilio Aguinaldo nga kinahanglang modangop sa taktikang gerilya ang mga rebolusyonaryong Filipino pinaagi sa pagpamanhig ug pagpangatake sa mga kampo sa Espanyol. Ang proklamasyon ni Aguinaldo iyang gihimo upat ka bulan human niya mailog ang liderato gikan sa Kataastaasang, Kagalanggalangang Katipunan nang manga Anak nang Bayan (KKK) Supremo nga si Andres Bonifacio kinsa iyang gipapatay niadtong Mayo 10,1897 human sa anomalosong piniliay diha sa Tejeros Convention ug ang silot gihatag sa usa ka “kangaroo court.” Ang pagpatay kang Bonifacio gikonsiderar sa Primero Ministro nga si Apolinario Mabikin nga usa ka krimen ug asasinasyon.

Lubong ni Princess Diana

1997 –Gidala ang patay’ng lawas ni Princess Diana sa Westminster Abbey sa UK alang sa paglubong kaniya sa samang adlaw. Kini human sa pipila ka adlaw dihang kini ug iyang adunahang uyab nadisgrasya sa awto sa Paris, France. Ang paglubong sa kontrobersyal nga prinsesa sa Britanya gisaksihan sa gibanabanang 2.5 bilyones ka tawo sa tibuok kalibutan. Human sa pribadong funeral ceremony sa Westminster Abbey gitago sa publiko ang pagdala sa patay’ng lawas niini ngadto sa usa ka isla sa Althorp diin ilubong ang mga   kabanay.

Sumusunod sa trono sa Japan

2006 – Human sa mga pagduhaduha ug espekulasyong dunay mahitabong kagubot sa royal family sa Japan, nanganak si Princess Kiko sa Japan sa usa ka batang lalaki nga ginganlan og Prince Hisahito nga gikonsiderar karong sumusunod sa trono sa amahan. Si Princess Kiko nanganak kang Prince Hisahito sa edad nga 39-anyos, ang trono sa Japan mahimo lang ipasa ngadto sa usa ka sumusunod nga lalaking anak sa kasamtangang emperador. BANAT NEWS