CEBU, Philippines – Si Mayor Valdemar Chiong sa dakbayan sa Naga mipahigayon sa iyang State of the City Address (SOCA) kagahapon atol sa ilang pagsaulog sa ika-5th Charter Day sa siyudad nga mao usab ang iyang ika-52 nga birthday.
Gibutyag ni Chiong sa iyang SOCA nga niining tuiga gibana-banang mokabat sa P535 milyones ang annual budget sa siyudad diin ang P242 milyones niini naggikan sa Internal Revenue Allotment (IRA) ug ang P293 milyones naggikan sa koleksyon sa buhis sa Naga.
Ang budget karong tuiga mas dako itandi sa milabay’ng tuig nga may P180 milyones lang.
Ang mga gitukod nga patigayon ug nagkalainlaing industriya diha sa Naga maoy usa sa labing daku og natabang sa misaka ang kita sa siyudad matud sa mayor.
Kabahin sa inprastraktura ang siyudad migahin og P50 milyones alang sa katukoran sa Enan Chiong Activity Center, P80 milyones alang pagsemento sa mga karsada, P7 milyones alang sa gitukod nga bag-ong sam-ang, P30 milyones alang sa pagpalapad sa reclamation project ug P10 milyones alang sa katukoran sa mga basketball court sa kabarangayan.
Karong tuiga ang Naga naningkamot nga matapos ang duha ka dagkung proyekto sama sa bag-ong ihawan nga gigahinan og P20 milyones ug ang bag-ong merkado nga gigahinan og P80 milyones.
Ang kagamhanan sa siyudad migahin usab og P95 milyones alang sa nagkalain-laing programa sa edukasyon lakip na niini ang scholarship program.
Sa panglawas ,ang Naga mi-destino og mga nurse ug midwife sa matag barangay nga maoy moatiman sa mga molupyo nga dunay problema sa panglawas.
Ang Naga gilangkoban sa 28 ka mga barangay diin mikabat usab sa 10,000 ka mga Naganhon ang gipa-membro na sa PhilHealth insurance.
Kabahin sa pagpreserba sa kalikopan si Chiong mipasigarbo nga ang Naga maoy unang Local Government Unit (LGU) nga nakatuman sa mandatory nga panginahanglan sa Department of Environment and Natural Resources (DENR) sa paggamit og haum nga dumpsite.
Ang siyudad mipatukod sa Material Recovery Facility (MRF) sa barangay Pangdan.
Gawas niini mikabat na ngadto sa 15, 000 ka mga kahoy ang natanom sa siyudad sa nagkalainlaing barangay nga naglakip sa Uling, Alpaco, Cabungahan, Bairan, Cantao-an, Patag, Lanas ug uban pa. Ang social program wala usab makalimti sa kagamhanan sa Naga diin mohatag sila og P500 matag adlaw sa matag senior citizen nga ma-hospital.
Ang mga babayeng biktima sa pagpanagmal, kabataan nga biktima sa pagpangabuso, may deperensya sa pangisip,may apan sa panglawas, mga masakiton, may tabang nga mapaabot gikan sa kagamhanan sa siyudad. (WC) BANAT NEWS