CEBU, Philippines – Nakabsan sa kinabuhi ang magtiayon human masabak sa naligid nga bato sulod sa ilang balay sa sitio Pangilatan, barangay Cantao-an, syudad sa Naga sa miaging Martes sa gabii.
Ang mga biktima mao ang magtiayong Dionesio Belarmia ug Juliana Belarmia pulos hingkod, nga may pito ka mga anak apan upat ra niini ang ilang kauban sa payag niadtong Martes sa gabii.
Sa pakighinabi sa mga tigbalita kang Junalyn, ang kamaguwangang anak sa biktimang magtiayon kini misaysay nga ang 11-anyos niyang manghod nga si Maricel maoy bugtong nakasaksi sa kamatayon sa ilang ginikanan.
Misaysay si Maricel nga samtang nagluto siya og saging sa ilang kusina nakadungog siya og kusog kaayong dahunog sa palibot samtang padayon ang pagbunok sa uwan ,hinungdan nga iyang gipukaw ang ilang amahan.
Apan wala kuno kini nanumbaling ug mipadayon kini sa pagkatulog, samtang ang ilang inahan igo lang usab kuno nga nangutana kun unsay midahunog.
Unya pipila ka minutos ang milabay mao na lay nakita ni Maricel ang iyang inahan ug amahan nga nagkadugo na sa ilang higdaanan.
Matud pa ni Maricel nga ang iyang manghud nga si Rommel, nga didto sa tiilan sa ilang ginikanan matulog nahigmata dihang nasabak kini sa mga sanga sa kahoy nga milamba sa ilang payag.
Busa gipukaw dayon niini ang iyang mga manghud nga sila si Cherry Ann, 6 ug Johnfel, 5 ug mihiplig kini sa daplin sa ilang bongbong nga distansya na sa ilang amahan ug inahan nga naligiran sa dakong bato sa maong higayon.
Gumikan sa ilang nasaksihan sa gidangatan sa ilang amahan ug inahan, si Maricel, maoy midagan ug nangayo og panabang sa ilang mga silingan nga may gilay-ong usa ka kilometero ug tunga sa kapatagang bahin sa ilang barangay.
Pag-abot sa mga silingan ug mga paryente sa mga biktima, nasuta nila nga wala nay kinabuhi si Juliana, samtang si Dionesio ila dayong gihatud ngadto sa Minglanilla District Hospital diin kini ideklarar nga patay na sa paghiabot didto .
Nasayran gikan kang Junalyn nga ang ilang payag sa maong lugar gitukod sa iyang amahan aron pahuwayanan sa panahon nga magabhian gikan sa pag-atiman sa ilang mga kahayopan. Gumikan sa maong payag dili na kini molusad pa ngadto sa lain nilang balay nga nahimutang sa patag.
Mibutyag kini nga daghan sila og kahayopan nga tua sa bungtod mahimutang nga naglakip sa kanding, kabaw, manok, ug may uma usab sila ug kasagingan.
Iyang giasoy nga sa maong higayon ang ilang inahan gikan pang namaligya og utanon sa lungsod hinungdan nga gumikan malagmit sa kalapoy sa lawas dali ra kaayo kining nakatulog dihang miligid kini sa kawayan nilang sawog.
Susama usab niini ang ilang amahan kinsa gikan sa ilang uma ug nanghipos sa mga kahayopan, kapoy kaayo busa nakatulog usab dayon.
Nasayran nga ang mga biktima dugay nang gipasidan-an sa ilang mga paryente nga angay mobiya sa maong lugar gumikan sa kapeligro sa palibot niini.
Daan nang nasayran sa mga biktima ug sa ilang mga silingan nga ang maong lugar nga gitukoran sa ilang payag, humok kaayo og yuta ug mga bato nga dali kaayong mangaligid.
Gani sa milabay’ng tuig naligiran na og bato ang maong payag makaduha ka higayon ug gani nasamad na sa lawas si Dionesio.
Ang mga anak sa maong magtiayon sa pagkakaron gisagop sa Department of Social Welfare and Development (DSWD) .
Sa laing bahin abagahon sa kagamhanan sa dakbayan sa Naga ang gasto sa pagpalubong sa mga biktima.
Sumala pa ni Mayor Valdemar Chiong nga iya na nga gimandoan ang mga opisyal sa City Social Welfare and Services nga ipa-asikaso ang haya ug ang katibuk-ang magasto gikan sa lungon ug sa paglubong niini.
Naglaraw usab ang mayor nga human sa lubong iyang pakigkitaan ang mga anak niini aron maplano usab niya kun unsay angayang ikatabang sa kagamhanan niini.
Gumikan sa maong hitabo gipasidan-an ni Chiong ang mga molupyo sa bukirang bahin sa Naga nga magbantay sa kahimtang sa panahon aron kun mobundak ang uwan makapangita dayon sila og kabakwitan aron pagsalbar sa ilang kinabuhi. (WC) BANAT NEWS