CEBU, Philippines - Naglabad ang ulo sa hepe sa kapolisan sa lungsod sa Carmen human kawata ang iyang 9mm pistol nga iyang gibutang sa iyang kilid tupad sa iyang asawa samtang nangatulog sila sa ilang balay sa barangay Cogon, dakbayan sa Danao niadtong Lunes sa kaadlawon. Ang biktima nga mao si Chief Insp. Jason Mangaron, hepe sa Carmen Police Station, kinsa nagkanayon nga lakip usab nga gikiriw sa wala hiilhing kawatan mao ang iyang cell phone nga balor og P2 mil nga diha ra sa iyang tupad uban sa armas de fuego. Si Mangaron mibutyag nga ang wala hiilhing kawatan didto moagi sa bintana sa luyong bahin sa ilang balay samtang siya ug ang iyang asawa nahinanok sa pagkatulog.
Matud pa niya nga nakalusot sa bintana ang kawatan pinaagi sa pagtangtang sa tulo ka blade sa jalousie niini.
Midugang siya nga unang nahigmata ang iyang asawa nianang alas 2:00 sa kaadlawon ug gipukaw siya niini dihang namatngonan niya nga nabuhang na ang ilang bintana.
Miingon si Mangaron nga mitimbakuwas siya sa pagbangon apan nalusno siya dihang nasuta niya nga ang iyang armas nga may duha ka magazine nga puno sa bala ug cell phone nga balor og P2 mil nawagtang na. Samtang si Cebu Provincial Police Office director Patrocinio Comendador nagkanayon nga padayon silang nakig-alayon sa kapolisan sa Danao City bahin niining kasoha.
Ang PRO-7 usab maoy mosusi sa maong kaso kun may kadanghag (negligence) ba nga nagpahipi sa bahin sa biktima aron pagsuta kun angay ba kining pabayron o dili sa maong armas. (Ria Mae Y. Booc/WC) (BANAT)