Kapilya nalusno mitabon sa minatay

CEBU, Philippines - Gumikan sa kakusog sa uwan usa ka tawo ang naangol samtang hapit madugmok ang lungon sa usa ka minatay dihang nalusno ang kapilya ug mitabon niini didto sa Sitio Anacma sa barangay Pagsabungan, dakbayan sa Mandaue kagahapon sa alas 2:00 sa hapon.

Ang naangol mao si Remegio Magallanes, 25, ulitawo, kinsa nag-apong sa lungon sa haya    ni Corazon Cordero, 70, molupyo sa maong lugar ug apohan ni Geremie Cordero nga uyab sa biktima. Ang samin sa maong lungon nabuak apan wala hinuon matandog ang lawas sa minatay.

Si Geremie nagkanayon nga sa wala pa malusno ang kapilya nga ginama sa gaan nga mga dapat, kauban siya ni Magallanes nga nag-apong sa haya sa iyang apohan.

Apan tungod sa pagpadayon sa uwan, gipanggutom sila busa migawas siya sa kapilya ug nagkuha og pagkaon sa ilang balay. Sa pagbiya niya mao gyuy pagkalusno sa kapilya nga bugtong hinungdan mao ang kakusog sa bundak sa uwan nga walay dala nga hangin.

Ang haya unya pa ilubong sa Lunes ug gibalhin kini og laing lugar nga gituldahan na lang.

Ang miugkat sa lungon   mao na ang mga sakop sa accident control rescue team. (Flor Z. Perolina/WC) (BANAT)