AlkanSSSya alang sa transport groups ug vendors

CEBU, Philippines - Gitakdang ilusad sa Social Security System (SSS) ang bag-o nila nga programa alang sa mga drayber ug operators sa traysikol ug mga vendors nga gitawag nga AlkanSSSya.

Matud pa ni Asst. Vice President Helen Solito sa Central Visayas nga ang tumong niini mao nga aron mahatagan og higayon ang maong sektor nga mabayran ang ilang premiums pinaagi sa AlkanSSSya adlaw-adlaw.

Gipasabot ni Solito nga sa tag-P10 matag adlaw nga ihulog sa usa ka drayber , operator ug vendor sa kahon matag adlaw nga anha ibutang sa usa ka terminal o sa lugar nga duol ra sa parkinganan sa mga traysikol o kaha sa mga vendors sa matag lugar.

Miingon si Solito nga ang mga drayber ug operator sa traysikol ug vendor makakwarta adlaw-adlaw, apan kun sila ray magtigom niini aron ibayad sa premium sa SSS inig katapos sa buwan maglisod sila tungod kay dili sayon ang pagkontrolar sa kwarta nga anaa ra sa sulod sa imong bulsa. Gipasabot ni Solito nga mahinungdanon kaayo nga magpasakop sa SSS alang sa ilang kaugmaon ug sa ilang pamilya.

Ang AlkanSSSya sumala pa ni Solito kini maoy labing sayon nga programa alang sa mga gitawag og self-employed nga miyembro sa SSS.

Sa AlkanSSSya gikinahanglan nga ang usa ka drayber, operator ug vendor sakop sa ilang tagsatagsa ka organisasyon nga rehistrado sa ilang lokal nga kagamhanan.

Matud pa ni Solito nga usa kini sa rekisitos nga gipangayo sa SSS alang sa buot magpasakop sa AlkanSSSya.

Ang kahon nga sudlananan sa ilang premium adlaw-adlaw ilang organisasyon maoy mobantay ug magdumala, mokupot sa record sa mohulog niini adlaw-adlaw. Miingon si Solito nga ang paglusad niini himuon human magtagbo ang mga tinugyanan sa SSS ug lokal nga kagamhanan sa matag dapit nga may daghang traysikol ug vendor nga nanginabuhi. (BANAT)