Pagdahili sa Camp 4 sa Talisay peligro

CEBU, Philippines - Nabutang sa peligro ang sitwasyon sa ubang mga residente diha sa barangay Camp 4, dakbayan sa Talisay ilabi na kadtong   mga balay naa mahimutang daplin sa karsada diin dunay gipahigayong pagkabkab sa pagpalapad sa karsada.

Kahinumduman nga niadtong Lunes sa kaadlawon ang yuta diha sa lugar midahili ug diriyot maigo sa dakong bato nga miuban sa pagdahili ang balay ni Jovencio Navecilla, 59 anyos, mamuhatay og mga pultahan nga kahoy.

Apan swerte kay ang maong bato nasangit sa railings atubangan sa balay. Si Navecilla nga nahinabi sa Banat News kagahapon mibutyag nga sobra na sa 10 ka tuig silang nagpuyo diha sa lugar ug karon lang sila nakasinati og pagdahili sa yuta sukad sa pagkabkab sa bukid aron palapdan ang karsada paingon ngadto sa dakbayan sa Toledo.

Ang maong lugar dunay sobra sa 50 ka mga residente kinsa ang mga balay naa daplin sa karsada ug nag-umbaw kini ngadto sa sapa. Gibutyag ni Navecilla nga niadtong Hulyo 14, 2012 unang nahitabo ang pagdahili sa yuta gisundan kini niadtong milabay’ng Sabado ug niadtong Domingo sa gabii.

Kagahapon ang mga tigbalita uban sa mga konsehal sa Talisay nga sila si Danny Caballero ug Val Ylanan misaka ngadto sa lugar ug tataw nga ang dapit peligrong agian sa mga motorista.

Si Caballero nagkanayon nga apektado kaayo ang mga residente. Kagahapon sa buntag gipahibawo ni Caballero ang iyang mga kauban sa konseho kabahin sa sitwasyon ug matud ni Bise Mayor Alan Bucao nga nahawanan na ang lugar tungod kay ang city engineering nagpadala na og heavy equipment nga motabang og hawan sa yutang mitabon sa karsada. (Brenda D. Batuto/EIM) (BANAT)