Salazar school way permiso

CEBU, Philippines - Gihulagway nga illegal ang operasyon sa Salazar Institute of Technology (SIT) nga nahimutang sa lungsod sa Madredijos isla sa Bantayan nga maoy sentro karon sa reklamo sa 26 ka estudyante nga gitaktak human sila mosalmot sa Pasigarbo sa Sugbo festival nga wa mananghid sa tagdumala sa maong tunghaan.

Matud pa ni Madredijos mayor Salvador Sally Dela Fuente atol sa interview sa Bantay Radyo nga walay mayor’s permit ang maong tunghaan nga gipanag-iya ni kanhi Madredijos mayor Doroteo “Dodo” Salazar.

Si Salazar nga nahimo usab nga kanhi bise mayor sa maong lungsod maoy higpit nga kaatbang sa politika ni Mayor Dela Fuente .

Apan matud ni Dela Fuente nga bisan kun walay mayor’s permit ang maong tunghaan iya kining gipasagdan tungod kay nalipay siya nga adunay katunghaan ang mga estudyante sa maong lungsod nga barato ra og matrikula.

Sa laing bahin hugtanong gihimakak niya ang pasangil nga wala sila mananghid dihang gipasalmot niya ang 26 ka mga tinun-an sa milabay’ng Pasigarbo Festival nga gipasiugdahan sa Kapitolyo didto sa Cebu International Convention Center (CICC) sa dakbayan sa Sugbo sa miaging Agosto nga nakapahimo sa maong grupo nga 3rd placer sa bangga sa sayaw.

Matud ni Dela Fuente nga ang organizer sa maong kalihukan maoy misuwat ngadto sa management sa tunghaan nga hatagan og exemption ang maong mga tinun-an nga mosalmot sa Pasigarbo sa Sugbo.

Gihulagway hinoon sa mayor nga napagan lang sa politika ang maong mga tinun-an ug mipasalig siya sa pagtabang kanila aron makapadayon kini sa pag-eskuyla.

Samtang si kanhi mayor Salazar miinsister nga ubos sa lagda sa eskuylahan , ang mga tinun-an mahimong maekspulsa sa pag-eskuyla kun makapalta   kini og tulo ka sunod -sunod nga adlaw nga walay balidong rason. Ang maong mga tinun-an midangop sa buhatan sa Department of Education (Dep-Ed)-7 ug sa Commission on Higher Education gumikan sa ilang problema. (Darrel A. Carumba/WC) (BANAT)