Ang pagbalik ni Kong. Sim Kintanar

CEBU, Philippines - Hingpit na ang desisyon ni kanhi Kongresista Simeon Kintanar nga magpapili pag-usab sa maong posisyon sa segundo distrito sa lalawigan sa Sugbo karong umaabot nga piniliay sa 2013 kansang plataporma ipunting sa pagpahunong sa “vote-buying” kon pagpamalit og boto.

Si Kintanar nga nakahuman sa iyang tulo ka termino kutob niadtong 2010 ikasangka sa beterano na nga magbabalaod sa nasud nga mao si Kongresista Pablo Garcia sa ikaduhang distrito ning lalawigan.

Sa iyang pakig-atubang sa taga The Freeman ug Banat News sa miaging adlaw gipadayag ni Kintanar nga gusto niyang masilsil sa alimpatakan sa katawhan nga ang pagpadaog og kandidato nga nagosyante og boto dili magbunga og maayong sangpotanan sa nasud.

Kini tungod kay mao kini pabilo sa kurapsyon nga maoy naglimin sa politika sa nasud ug nakapamaot sa hitsura sa politika sa Pilipinas, matud pa niya.

Miingon si Kintanar nga ang kasamtangang administrasyon gusto na nga mopungil sa sungay niadtong mga politiko nga maoy nagpa-uso niining pagpamalit og boto aron motungtong sa puwesto sa goberno ug pagkahuman way laing bisyo gawas sa pagpangurakot.

Kini tungod kay matud pa niya hagip-ot kaayo ang tulo ka tuig nga termino, diin ang kandidato nga mobuga og dakong puhonan nga kuwarta sa iyang pangampanya pinaagi sa pagpamalit og boto sa katawhan maningkamot nga makakiriw og dakong salapi sa goberno aron makabawi sa iyang naggasto sa iyang pagpapili sa iyang posisyon.

Si Kintanar nga maoy usa sa mga amahan nga nagpasulod sa modernong matang sa komunikasyon nga mao ang cellular phone sa nasud nga misangpot sa pagkahimo sa Pilipinas “text capital of the world” sa dihang commissioner pa siya sa National Telecommunications Commission   miingon nga sa magbabalaod pa siya daghan siya og mga nasang-at nga balaodnon apan pipila lamang niini ang nakalusot tungod kay dili basta-basta magpalig-on og balaodnon aron mahimong balaod sa kongreso ilabi na ang bahin sa iyang “stop vote-buying bill”.

Apan usa sa mga malampuson niyang bill nga misangpot   sa pagkabalaod mao ang “ seatbelt law” nga matud pa niya daghang kinabuhi ang nasalbar dihang gumikan sa pagtuman sa maong balaod ang migaid sa ilang lawas pinaagi sa seatbelt sa ilang sakyanan wala masugamak sa kamatayon dihang nakasugat og disgrasya ang ilang behikulo.

Nahinumdom si Kinatanar nga tungod sa iyang kampanya pagpuo sa vote buying, napildi niya ang usa ka banggiitang politiko sa Segundo distrito kaniadto nga hangtud karon wala na makatuyhakaw.

Didto nasuta ni Kintanar nga ang   labing   maayong magtutudlo sa tawo aron mahimong tinuod nga lungsoranon mao ang mga magbabalaod diin usa sa maong edukasyon mao ang pagpuo sa bisyo nga pagpamalit og boto.

Alang kang Kintanar kining iyang motto pagtudlo sa katarong sa tawo nga gisagop sa kasamtangan administrasyon nga mao usab ang pagtulun-an nga gibilin ni anhing DILG Secretary Jesse Robredo iyang ipatuy-aw ngadto sa katawhan ang iyang sipa ug lanog kaayong pahibawo nga kun gusto ang tawo nga mawala ang korapsyon sa nasud dili mopili sa mga kandidato nga mamalit og boto sa election sa 2013. (BANAT)