Run for Freedom alang sa rebel returnee

CEBU, Philippines – Gitakdang ilusad ni Anad Partylist Representative Pastor “Jun” Alcover ang proyekto nga “Run for Freedom and Democracy” karong Septembre 23, 2012 , usa ka proyekto nga gitumong aron ikatabang sa mga kanhi rebelde nga mibalik na karon sa sabakan sa kagamhanan.

Sa usa ka press conference kagahapon   didto sa Baseline Restaurant ning dakbayan sa Sugbo, gipasabot ni Alcover nga ang maong kalihokan ipahaom usab niya sa kasaulogan sa proclamation sa Presidential Decree(PD) 1081 nga nagdeklarar sa Martial Law pinaagi ni anhing Presidente Ferdinand Marcos.

Gitataw ni Alcover nga daghan sa mga rebeldeng New People’s Army (NPA) ang mipahimulos sa “Balik Baril Program” sa kagamhanan.

Sa maong programa ang gisurender nga armas sa maong mga rebelde gibugtian sa kagamhanan og kuwarta alang sa ilang panginabuhi.

Maoy hinungdan matud pa ni Alcover nga nangita siya og paagi nga makatigom og salapi pinaagi sa paglusad sa Run for Freedom and Democracy aron kutob sa kitaon niini ikapang-apod-apod niya ngadto sa mga rebel returnee aron makapanginabuhi silang malinawon.

.Manukad sa Plaza Independencia ug mosubay sa SRP, mobalik kini sa Plaza Independencia diin adto usab kini tapuson.

Dugang pa ni Alcover nga langkoban kini sa tulo ka mga kategoriya nga mahimong salmotan sa mga runner nga modagan sa 3K kon tulo ka kilometro, diin matag mosalmot mobayad sa rehistrasyon nga P250, sa 6K kon unom ka kilometro, P300 ang rehistrasyon, ug sa 12K kun 12 kilometro , P350.

Sa mosalmot ug mobayad sa maong rehistrasyon, may libre na nga T-shirt ug snacks, matud pa ni Alcover.

Gilauman ni Alcover nga hugopan kining maong proyekto sa kadaghanan kinsa may panglantaw sa pagtabang sa mga rebel returnee.

Nagkanayon si Alcover nga iya usab nga gisuta karon ang hingpit nga gidaghanon sa mga rebel returnee base sa listahan sa kapolisan ug militar. (WC) BANAT NEWS