Sunog P500 mil ang danyos

CEBU, Philippines – Haligi na lang sa ilang balay ang nagbarug nga maoy naabtan sa duha ka tinun-an nga nagpuyo   sa maong balay nga nahimutang sa F. Pacaña Street, barangay Punta Princesa human kini masunog kagahapon pasado alas 10:00 sa buntag.

Ang maong balay gipanag-iya ni Bert Leo Abella kinsa tua sa gawas sa nasud ug gibilin niya sa   iyang mga apo nga sila si Sillehca Teresa Desuyo ug Mary April Abella .

Matud pa ni FO2 Omar Segovia sa Cebu City Fire Department nga maoy imbestigador sa maong sunog nga ilang gibana-bana nga mokabat sa kapin kun kulang P500 mil ang danyos sa maong kabtangan nga nasunog nga ilang gipaubos sa 3rd alarm.

Dugang pa ni Segovia nga sa ilang nasayran nga didto magsukad sa ikaduhang andana sa lawak ni Desuyo ang kayo base usab sa pamahayag sa nakakita nga si Louise Teresas Jr.

Gibutyag usab ni Segovia nga ila pang gisubay kun unsa gayud ang hinungdan sa maong sunog tungod kay matud pa ni Desuyo nga naandan na nilang molakaw nga ibton ang tanang na-plug nga appliance sa balay.

Nakontrolar sa bombero ang maong sunog sulod lang sa 10 minutos ug wala kini makatabok og laing mga balay. (WC) BANAT NEWS