27 tinun-an gi-drop sa SIT kay wala mananghid

CEBU, Philippines – Midangop ngadto sa buhatan sa Commission on Higher Education-7 ang 26 ka mga tinun-an sa Salazar Institute of Technology sa lungsod sa Madridejos tungod sa giingong pag "dropped" kanila sa maong tunghaan tungod sa ilang pagsalmot sa bag-ohay pang nahuman nga Pasigarbo Festival nga gipasiugdahan sa probinsya sa Sugbo.

Apan si SIT chairman of the board ug president Doroteo "Dodo" Salazar daling misalikway sa alegasyon sa maong mga tinun-an ug mibutyag nga wala lang sila tugoting makabalik og sulod sa klase hangtud nga dili sila makapakita og balidong suwat nga mag-esplikar nganong sila na-absent.

"This is a wake up call for the parents. A student cannot just violate the school rules and regulations and policies," matud pang Salazar.

Si Constancio Paras, Jr., usa ka fourth year college sa maong tunghaan ug maoy nag-representar sa grupo mibutyag nga wala na sila dawata pa sa maong tunghaan ug giingong gi-drop na sila tungod sa pag-apil nila sa maong kompetisyon.

Si Salazar sa iyang bahin miingon nga ang mga tinun-an wala hatagi og awtorisasyon nga moapil sa maong festival tungod kay ang mismong munisipyo sa Madredijos wala mananghid sa tagdumala sa tunghaan nga paapilon nila ang maong mga tinun-an.

"Wala mananghid namo ang mayor. Kay kung nananghid pa, I could even send some of my teachers to chaperon these students. Ug unsa uroy mahitabo ana nila ini og ari sa Cebu, kinsa man ang manubag ana?," sumala pang Salazar.

Si Salazar, kinsa kanhi mayor ug bise mayor sa maong lungsod mitug-an nga bisan si Mayor Salvador dela Fuente mibahad nga pasirad-an ang iyang tunghaan kung dili tugutang makabalik ang mga tinun-an.

Matud pa nga sila si Salazar ug dela Fuente kanhi magkaalyado sa politika, si Salazar maoy bise mayor ni dela Fuente niadtong 2007 ug niadtong 2010 nagkaatbang ang duha sa pagkamayor apan naparot si Salazar.

“But walay politika aning isyuha. This is about imposing discipline on our students. Asa man kuhaon ang pulitika ana?,” matud pa sa kanhi mayor kinsa mitandi sa Bantayan nga mipadala gyud og suwat ang mayor ngadto kaniya nga nananghid bahin sa mga tinun-an nga mosalmot sa maong festival.

Apan si Dela Fuente nagkanayon nga dili niya buot nga mag-apilapil sa maong isyu ug dili niya buot iduhig ang kaugalingon sa pamolitika.

Iyaha usab gihimakak ang pasangil nga iyang gibaharan ang maong tunghaan nga pasirad-an kung dili pabalikon ang mga tinun-an.

Sa 27 ka tinun-an, usa niini ang giingong gitugotan nang makabalik sa eskuylahan human maoy mitug-an kinsay nag-agni sa ubang tinun-an pagsalmot sa maong festival nga buot ni Salazar nga ikiha sa nahitabo.

Si Paras mibutyag nga buot unta nilang mobalhin og laing tunghaan apan dili nila makuha ilang transcript of records(TOR) tungod kay duna pa silang tanan utang nga P413,000.00. ( EIM) BANAT NEWS