350 aftershocks ang natala

CEBU, Philippines - Kapin sa 350 ka aftershocks ang natala sa Eastern Visayas sukad sa magnitude-7.6 nga linog niadtong Biyernes sumala pa sa Philippine Institute of Volcanology and Seismology (Phivolcs) kagahapon.

Si Phivolcs director Renato Solidum Jr. nagkanayon nga base sa ilang talaan gikan niadtong Biyernes hangtud Lunes sa alas-3 sa kaadlawon nakatala sila og 351 ka aftershocks, kadaghanan niini hinay.

Apan usa ka oras gikan sa pagtay-og niadtong Biyernes sa gabii aduna silay mga natalang magnitude 6.8 ug magnitude 6.4 sumala pa niini sa report sa GMA News Online nga gikutlo gikan sa DzBB.Sagad sa mga aftershocks wala kaayo mabatyagi sa mga tawo tungod kay ang uban niini atoa sa kadagatan nahitabo. Kahinumdoman nga niadtong Biyernes gitay-og ang Guiuan sa Eastern Samar nga ang gikusgon nabatyagan sa pipila ka bahin sa Mindanao.Ang pagtay-og nakapaalarma sa publiko ug gipasidan-an kabahin sa posibleng pagtumaw sa usa ka tsunami ilabi na sa mga isla nga nag-atubang sa dagat Pasipiko.Ang National Disaster Risk Reduction and Management Council mibutyag nga usa ang namatay samtang P12 milyones nga mga imprastraktura ang nadanyos niini.

Giawhag sa Phivolcs ang publiko nga dili mokumpiyansa ug kinahanglang mangandam sa mga mosunod pang aftershocks samtang gidugang ni Solidom nga dunay mga posibilidad nga mosibog ang ubang bahin sa Philippine Trench sa bisan unsang oras.

Sa report sa AFP kagahapon, dunay magnitude 5.9 nga linog nga nabatyagan sa Celebes Sea duol sa Palimbang apan gihulagway kini sa Phivolcs nga hinay ra aron makamugna og kadaot.(Gikan sa Wires/EIM) BANAT NEWS