Bunga sa tinikad

Sumpay ug kataposang gula

Sa mahibiling kantidad, mogahin siya’g "savings" ug ang nabilin pa mao ra ang iyang gastohon hangtod na sab makalabang sa sunod tingsweldo.

"Wa gyud ko magbinuraska kay lisod kaayo pangitaon ang kwarta. I learned to live within my means. Ug unsa lang ang budget mao lang na ang gastohon. Dili ta anang lifestyle nga dako pag gasto kaysa atong kita kay mao nang dili ta mabadbad sa problema," tambag ni Archie sa tanang naglisod karong panahona tungod kay materyoso o banidosa kaayo.

Sa iyang pag-istar sa Manila lumon sa iyang paryente, nasinati niya ang kalisod kay lagi maikog man siya nga dili motabang sa lihokon sa balay ug ingon man sa galastohan.

"Nakaapil pa gyud ko’g bantay sa tindahan, bantay og bata kay ingon ana man gyud ang pamatasan nato nga kun moipon ta, di ta pwede magmika."

Mibalhin siya’g trabaho og arang-arang na unta ang suholan nga mokabat og P7,000 ang bulan isip auditor, apan ang iyang amo nga dakong negosyante sa natad sa construction, trading ug warehousing sa Manila, nalambigit og kontrobersyal nga kaso.

Matud sa balita, ang iyang amo nakapusil og anak sa usa ka prominenteng pamilya tungod sa panagbangi sa karsada. Kanang gitawag og road rage. Napatay sa iyang amo ang maong babaye.

Sa dagan sa kaso, namatngunan ni Archie nga malagmit ipa-imbestigar ang mga pamatigayon nga gisudlan sa iyang boss, busa nakahukom siya mangita’g laing trabaho sa kahadlok nga ipatawag og mga inquiry.

"Basin ba og paablihan ang mga journal, nya ako baya ang audit assistant. Makuyawan kog mga ingon ana. Kay parehas anang sa TV o mga inquiry in aid of legislation, mahimo namang in aid of humiliation," pagyagyag pa niya. Mao ‘to nga nangaplay siya sa usa ka cargo forwarding company nga nangita’g trabahanteng andam moalagad sa sanga niini dinhi sa Sugbu. Tungod sa halapad na niyang kasinatian, nadawat dayon siya isip assistant branch manager. Tuig 1998 kadto. Sa maong kompanya siya nakat-on og mga pamaagi pagdala og negosyo lakip na ang mga angayang likayan ug angayang sudlang transaksyon.

Sa dihang gisugdan na niya ang pagtukod og iyang kaugalingong kompanya tungod sa maayong dagan sa freight forwarding industry dinhi nagmantinir una siya sa usa ka gamay’ng lawak isip opisina. "Usa sab na sa akong nakat-onan sa pagbaul. Start small.

Ginagmay’ng lakang lang. Matud pa nga kun mubo ang habol, makat-on tang magtikungkong lang usa.

Kining tagsulat nga iyang kanhi ka-board mate, buhing saksi kun giunsa niya pagdiskarte nga maka-opisina gihapon bisan sa kahuot sa iyang kwartong giabangan sa Maguikay, Mandaue City.

Ang luna igo lang gyud niyang kabutangan og facsimile machine, industrial fan, filing cabinet, gamay nga receiving area alang sa mga bisita, gamay nga kusina, ug may lunang kahigdaan - sulbad ang unang "business address" niya.

Niadtong panahona, duha lang ang iyang kaabag, maoy iyang mga mensahero. Apan tungod kay ang kaalam sa bukidnon nakagamot naman sa iyang pagkatawo milambo kini.

Daghan sa iyang mga kliyente nga nahinabi ning tagsulat miingon nga customer service ug ang diplomasya ni Archie taliwala sa "walay puangod" nga industriya ang iyang alas ning iyang gisudlang negosyo.

Tinuod nga dili siya motihiktihik basta customer relations na ang hisgutan. Bigay-todo sa pagpahimutang sa ipadalang kargamento sa iyang mga kliyente.

Niya pa nga ang kustomer nga malipay ug makaangay mahibaw-an dayon kay mobalik ug magdala pa’g laing kustomer. Mao ni iyang tirada: Word-of-mouth publicity.

Bisan og daghan na ang mga ahente sa freight forwarding sector dili kalikayang dunay mamuhal ug mo-submarino apan gibalewala ra niya kini.

Kay niya pa, mas gusto niyang magpanday og taytayan kaysa magtukod og paril.

Gawas sa Quiksilver Freight International Services, malamposon usab ang iyang Nice Day! Car Wash franchise, labi na nga iyang mga kustomer mihulagway sa iyang serbisyo nga matinud-anon.

Ug nga dili sila mahadlok ibilin ilang sakyanan kay maayo ang agi sa pagpanglimpyo. Nakahatag kining iyang mga negosyo og trabaho sa 15 ka tawo na karon. Sila mga taga Cagayan de Oro gihapon - paryente ug kaila - nga dugay na niyang buot tabangan.--Katapusan