Mga prayoridad ni Chiong sa Naga

CEBU, Philippines – Si Mayor Valdemar Chiong sa dakbayan sa Naga misentro karon sa pagpalapad sa ilang pangalagad sa panglawas sa katawhan ug sa edukasyon sa maong dakbayan.

Apan gawas niini nagpadayon usab ang mga proyekto nga may labot sa inprastraktura, matud pa sa mayor.

Ang mayor nagkanayon ang mga gastohunon niining mga proyektoha kuhaon gikan sa buhis nga gibayad sa mga kompaniya nga gitarok sa maong dakbayan sama sa Kepco-Salcon Power Corp., Sarimanok Feed Mills, Serilyn Agro ug uban pa.

Ang maong mga kompaniya gawas nga nagbayad og dagkong buhis nakatabang usab sa paghatag og trabaho ngadto sa mga molupyo sa maong dakbayan, sumala ni Chiong.

Apan alang kaniya, ang nag-una nga gihatagan niya og prayoridad sa tanan mao ang edukasyon sanglit daghan kaayong mga batan-on sa Naga nga maayo og pangutok apan gumikan sa kakabus maglisud sa pagpadayon sa pagtungha sa kolehiyo aron makakab-ot og kurso.

Dinhi niining butanga ibuhos sa kagamhanan ang tanan niyang paningkamot tungod kay lapad kaayo ang kinutoban niini sanglit ang pag-atiman sa mga eskuylahan ug mga panginahanglanon sa mga magtutudlo ug sa mga tinun-an langkubon man dinhi.

Sa pagkakaron ang kagamhanan nagpatungha og mga 100 ka scholar o mga kabus apan utokan nga mga estudyante nga gigahinan og P30 mil matag usa.

Gani usa sa mga suliran karon sa kagamhanan sa Naga mao usab ang pagpatukod og dugang mga edipisyo sa eskuylahan aron matuman ang ratio nga 1:40 o matag lawak dili molapas sa 40 ka estudyante ang isulod.

Matud pa ni Chiong nga sa bahin sa panglawas matag usa sa 28 ka barangay duawon na upat ka higayon sa mga doktor sa dakbayan aron sa pagsiguro nga maatiman gayud ang maayong panglawas sa katawhan nga gibayran usab sa gobiyerno og tag P2,000 matag duaw.

Midugang si Chiong nga may 20,000 ka mga kabus nga pamilya sa Naga ang narehistro na isip sakop sa   PhilHealth agi og proteksyon kanila sa panahon nga magpatambal sila sa hospital. Samtang miingon si Chiong nga andam na ang tanan alang sa ika-limang tuig nga kasaulogan sa Charter Day sa Naga karong Septiyembre 5, 201. - BANAT NEWS