Dasmag motor vs. de karga 2 angol

CEBU, Philippines – Kritikal ang kahimtang sa mag-agaw nga babaye ug lalaki human madasmag sa trak de karga ang motorsiklo nga ilang gisakyan didto sa highway sa barangay Gahad lungsod sa Sibonga, kagahapon sa alas 7:30 sa buntag.

Ang mga biktima mao ang drayber sa motorsiklo nga si Allan Rojo Pangautan, 30, minyo, nga taga barangay Matimao-an, lungsod sa Carmen, ug si Vivian Rojo, hingkod, dalaga, nga iyang ig-agaw, nga iya   ra usab nga silingan nga maoy iyang angkas sa maong higayon.

Samtang ang drayber sa cargo truck nga ilang kadasmag mao si Margarito Carsalo Jr, hingkod, nga taga barangay Manlapay, lungsod sa Dalaguete.

Ang   de karga gipanag-iya sa Purong Cebu Coal Corporation of Corporate Center nga nagbase sa Makati City.

Si Insp. Wilfredo Tauto-an, hepe sa Sibonga Police Station mibutyag sa Banat News   nga ang motorsiklo   nga gisakyan sa mga biktima gikan pa sa siyudad sa Sugbo ug paingon sa lungsod sa Argao, sa dihang gikasugat nila ang trak de karga nga nagpaingon usab sa dakbayan sa Sugbo.

Pag-abot   nila sa maong lugar nga kurbadahon didto sila makasugat og disgrasya dihang mi-overtake ang motor sa mga biktima sa gisundan niining minibus.

Unya kay wa man kini makalusot dayon kay paspas man usab kaayo ang minibus nga ilang gisundan, busa wala kini makaikyas sa de karga nga gikasugat nila kansang drayber nakalitan ug wala makapahunong dayon sa iyang sakyanan apan naglisud usab kini   paglikay sa motorsiklo gumikan kay ang kilid sa karsada sa iyang dapit delikado kaayo nga misangpot sa   pagdinasmagay gyud nila.

Gawas nga nalamba ang motor, naguyod pa kini og usa ka metro uban ang mga biktima una makapreno ang drayber sa de karga.

Ang motorsiklo ug ang duha ka biktima didto na sa ilawom sa de karga bunlota human sila mapasok didto.

Gihatud dayon ngadto sa tambalanan sa dakbayan sa Sugbo ang mga biktima kinsa pulos nahimutang sa talandugon nga kahimtang samtang ang drayber sa de karga kasamtangang gibalhug sa prisohan sa kapolisan sa lungsod. (/WC) BANAT NEWS