Amahan ug anak gipamusil angol

CEBU, Philippines – Samaron ang amahan ug anak nga gipamusil sa duha ka wala hiilhing lalaki nga nagsakay og motorsiklo didto sa merkado publiko sa barangay Cansaga, lungsod sa Consolacion sa miaging gabii.

Ang mga biktima mao sila si Benjamin Demecillo, 74, minyo, ug ang anak niini nga si Lupe Demecillo, 35, minyo usab nga taga barangay Maslog, dakbayan sa Danao.

Si PO1 Ardian Balanay sa kapolisan sa maong lungsod nga nahinabi sa Banat News miingon nga naninda og ukay-ukay   nga mga senina sa merkado publiko sa maong lungsod ang mga biktima dihang kalit lang gipamusil sa duha ka lalaki nga nagsakay og motorsiklo. Apan matud pa ni PO1 Balanay nga walay nakaila sa mga kriminal gumikan sa ka sirado sa mga helmet niini.

Human sa maong pagpamusil   nakasibat dayon ang maong mga kriminal busa wala na hiabti sa kapolisan nga miresponde sa maong alarma.

Matud pa ni PO1 Balanay nga si Benjamin naigo sa iyang tiil ug sa bukton ug sa hawak usab masabak ang anak niini nga si Lupe.

Ang duha ka biktima dali nga gidala sa Chong Hua Hospital sa dakbayan sa Sugbo ug padayon kining giatiman sa mga doktor sa maong tambalanan. Matud pa ni PO1 Balanay nga dili pa nila matataw kun unsay hinungdan sa maong pagpamusil kay paabuton pa nila nga makagawas gikan sa tambalanan ang mga biktima.

Hinuon padayon silang naniid sa mga kriminal nga miluthang sa mga biktima. (WC) BANAT NEWS