Dalaga nasakmita'g 9 ka paketeng shabu

CEBU, Philippines – Siyam ka pakete sa shabu ang nasakmit sa kapolisan gikan sa usa ka level 2 drug pusher nga babaye atol sa buy bust operation sa barangay Canduman, dakbayan sa Mandaue   sa miaging gabii.

Si PO2 Gilbert Igot miila sa nadakpan   nga si Mercedeta Polungpong, 40, dalaga nga nagpuyo sa Zone 5, sa barangay Canduman, sa maong dakbayan.

Matud pa ni PO2 Igot nga ang team nga gipangulohan sa ilang hepe nga si Inspector Ramil Morpos maoy mipahigayon sa maong buy bust operation.

Dugang pa niya nga gihimo nila ang buy bust human sa pipila ka adlaw nga pagpaniid sa kalihokan sa maong suspetsado nga ilang nasuta nga supplier og shabu dili lang sa barangay Canduman kundili lakip na ngadto sa barangay Talamban sa dakbayan sa Sugbo.

Matud pa ni PO2 Igot nga ang ilang police decoy nga usa usab ka polis maoy nakigsabot sa maong dinakpan nga magdala og daghan kay paliton niini.

Ang unang gihatag sa ilang police decoy mao ang P300 nga marked money busa gitunol usab dayon sa maong suspetsado   ang usa ka pakete nga shabu.

Sa maong higayon mihamag dayon ang mga polis nga gipangunahan   ni Inspector Morpos ug mga kauban ug diha-diha ila dayon kining gisikop.

Dihang gihiling sa kapolisan ang ubang bahin sa balay sa suspetsado nasakpan usab nila  ang dugang   walo pa ka pakete nga shabu ug ingon man ang P1,000 salapi nga ilang gituohan nga halin usab niini.

Ang maong dinakpan nga gibalhog karon sa detention cell sa Presinto 2 sa Mandaue City Police Office (MCPO) nga nagbase sa barangay Subangdaku gitakdang pasakaan og kaso   gumikan sa paglapas sa Republic Act 9165 kon Comprehensive Dangerous Drug Act of 2002. (/WC)BANAT NEWS