Ang Kasaysan (Septiyembre 2 )

CEBU, Philippines – Pormal nga paghunong sa World War II

1945--Septiyembre 2, 1945 pipila ka adlaw human gibombahan sa Amerika og atomic bombs ang Nagasaki ug Hiroshima sa Japan, pormal nga milagda sa ilang pagtahan ang Japan nga maoy nagtapos sa Ikaduhang Kalibutanong Gubat sa Pasipiko. Human niini gihatag sa Amerika ang dugay nang gipangandoy sa Pilipinas nga kaugalingnan, apan luyo sa maong gasa gikan sa Amerika ang Pilipinas nag-inusarang misapupo ug misulbad sa nabiling problema sa maong giyera nga miresulta sa kamatayon sa kapin usa ka milyong Filipino. Atol sa maong giyera dinhi sa Pilipinas 60,000 ka Amerkano ug 300,000 ka Hapon ang nakalas.

Ho Chi Minh mideklarar og kaugalingnan sa Vietnam

1945 –Gideklarar ni Ho Chi Minh ang popular nga lider sa komunista sa Vietnam ang kaugalingnan gikan sa mga kamot sa mananakop nga Pranses (France). Apan ang France wala mohunong ug gisakop ang South Vietnam ug nakig-negosasyon kang Ho Chi Minh apan nahugno ang maong negosasyon pagkasunod tuig (1946) hinungdan sa pagpamomba sa mga French Navy sa siyudad sa Haiphong.

Traffic Education

(Cautionary Sign)

Cycling Crossing sign

Kini nagpasabot nga dunay mga tawong magbisekleta nga kanunay’ng moagi sama na lang sa mga lugar duol sa mga parke, national parks, mountain resorts, ug bisan na sa mga syudad nga dunay gibutang nga bicycle lanes. TIPS: Ang motorista kinahanglang mohunong kung dunay molabang nga magbisekleta, batasanon ang pagpaniid sa palibot basin dunay kalit nga motabok nga magbisekleta ilabi na sa mga dapit nga subidahon ug lugsungon. Ayaw pag-abuso tungod kay mas makamatay ang sakyanang de makina itandi sa bisekleta. BANAT NEWS