Sakyanan sa gobiyerno giabuso og maayo

CEBU, Philippines – Subay sa “Tuwid na Daan” nga programa ni Presidente Noynoy Aquino, ang Oplan Red Plate Task Force dinhi sa Sugbo nga gipanguluhan sa Office of the Ombudsman -Visayas sayong mipahigayon niining buwana og usa ka surprise operation sa syudad sa Sugbo ug syudad sa Mandaue.

Matud pa ni Elmer Gutierrez sa Ombudsman Visayas nga kaabag nila sa maong implimentasyon ang Police Regional Office-7 (PRO-7), ug ABS-CBN Central Visayas adunay tag upat ka mga personnel samtang ang Land Transportation Office (LTO-7) ug Land Transportation Franchising and Regulatory Board (LTFRB-7) aduna usab duha ka mga personnel.

Dugang pa ni Gutierrez nga ning bag-ohay lang nga operasyon sa Oplan Red Plate Task Force ,18 ka sakyanang iya sa gobiyerno nga gigamit sa dili opisyal nga mga lakaw ang ilang nasakpan.

Gibutyag ni Gutierrez nga ang mga nagdala niini wala makapresentar og valid trip tickets nga usa sa mga rekisitos nga gipangayo sa Commission on Audit sa matag gamit sa mga sakyanan sa gobiyerno.

Sagad sa mga nasakpang sakyanan gi-park sa nagkadaiyang mga malls sama sa Ayala Cebu, SM City Cebu, Parkmall ug lakip na sa Cebu International Convention Center (CICC) niadtong miaging Agosto 11 ning tuiga.

Ang opisyal sa OMB midugang nga ang service vehicle lamang sa lungsod sa Liloan ang nakapresentar og balidong dokumento.

Samtang si Belle Quijano, Chief of Corruption Prevention and Education Group sa OMB-Visayas miingon nga sukad niadtong Hulyo ning tuiga, ang iyang opisina nakadawat og 1,162 mga reklamo kabahin sa pag-abusar og gamit sa mga sakyanan sa gobiyerno sa tibuok rehiyon sa Visayas.

Aduna na silay gipasakang 740 ka kaso, 21 ang na-upgraded ngadto sa criminal ug administrative case samtang ang nahabiling 401 ka kaso nagpadayon pa gihapong pending tungod sa dugang imbestigasyon nga gihimo.

Si Ombudsman for the Visayas Pelagio Apostol sa usa ka interview sa ABS-CBN sa programa niining “Tubag” kini mipahinumdom nga ang bisan paggamit sa mga sakyanan sa gobiyerno sa dili opisyal nga mga lakaw makunsiderar na kining kurapsyon.

Ang Ombudsman Visayas acting director sa Public Assistance and Corruption Prosecution Office nga si Atty. Karla Juris Tanco miingon nga magpadayon gihapon ang pagpanakop o pagsitar sa mga red plates sa kadalanan. (/EIM) BANAT NEWS