Pasangil gihimakak ni Mariñas

CEBU, Philippines – Gihimakak ni Mayor Teresito Mariñas sa lungsod sa Barili ang pasangil nga may labot siya sa nahitabong stampede didto sa   Sports Complex sa maong lungsod sa miaging semana.

Matud pa niya nga sama usab sa grupo sa iyang bise mayor, pulos sila walay labot sa maong hitabo kay proyekto kadtong tanan sa Department of Social Welfare and Development (DSWD).

Ang pamahayag ni Mariñas may labot sa mga huhungihong nga may papel siya isip mayor   sa maong hitabo busa iyang gitataw nga ang proyekto nga Pantawid Pamilya Pilipino Program (4Ps) dili iya sa lokal nga kagamhanan sa Barili kundi iya sa DSWD.

Maoy hinungdan nga niadtong pagpang-apod-apod sa mga kawani sa DSWD sa hinabang pinansyal ngadto sa mga kabus nga Barilinhon kinsa sakop sa 4Ps, wala siya didto sa palibot sa sports complex, matud pa sa mayor kay mitambong siya sa miting   uban sa mga opisyal sa Department of Environment and Natural Resources (DENR), ug National Economic Development Authority (NEDA) sa pagtuki nila sa suliran bahin sa sinkhole sa barangay Mantayupan.

Gihisgotan pagbalik ni Mariñas ang maong isyu aron pagpapas sa hunahuna sa ubang Barilinhon ug sa iyang kaatbang nga may labot siya isip mayor sa maong proyekto sa DSWD nga nakahatag og kakuyaw sa uban dihang nahitabo ang stampede. (WC) BANAT NEWS