Wanted kay nakapatay sikop

CEBU, Philippines – Nadakpan sa kapolisan ang usa ka mag-uuma nga wanted sa kasong pagpatay sa iyang silingan didto sa barangay Ablayan, lungsod sa Dalaguete sa miaging udto.

Ang suspek nga nagtingkagol na karon sa karsel mao si Alejandro Amanence Monseda, 25, ulitawo, mag-uuma, nga taga barangay Salog, sa maong lungsod.

Samtang ang biktima mao si Joebert Elhig, hingkod, nga silingan sa suspetsado ug usa usab ka mag-uuma.

Si SPO1 Veronico Centino sa Dalaguete Police Station mibutyag sa Banat News nga nakadawat sila og report bahin sa nahimutangan sa suspek hinungdan nga milusad dayon sila og operasyon niadtong Biyernes sa udto.

Pag-abot nila sa maong lugar naabtan pa nila ang suspek hinungdan nga ila kining gikomprontasi apan ang saksi nga si Silvano Cartilla, hingkod, nga kauban sa biktima maoy positibong miila sa suspek hinungdan nga gidakop dayon kini sa kapolisan ug gibalhug sa karsel.

Gisakmit usab sa mga otoridad ang Honda TMX 155 nga motorsiklo nga maoy gimaneho sa suspek diin ang biktima ug ang saksi maoy iyang angkas sa miaging buwan sa ilang pagpanisko sa maong higayon didto sa barangay Dumalan.

Gidudahan sa kapolisan nga paingon unta malagmit nga manuyop og shabu ang biktima ug ang suspek apan gumikan kay wala sila magkasinabot, misangpot sa ilang panaglalis hangtud nga gipusil patay sa suspek ang biktima.

Ang saksi nagkanayon nga sa maong higayon nanaug siya sa sakyanan kay nangihi sa dihang naglalis ang suspek ug ang biktima.

Dihang nakita niya sa akto ang hitabo mikaratel siya og dagan pahilayo sa maong lugar kay siya na usab unta ang isunod sa pagpusil sa suspetsado.

Giandam na ang  tukmang kiha nga isang-at sa kapolisan batok sa suspetsado. (/WC) BANAT NEWS