MOA tali Kapitolyo ug CEMEX pirmahan

CEBU, Philippines – Gitakdang pirmahan na sa Septiyembre 6, 2012 ang Memorandum of Agreement (MOA) tali sa CEMEX ug sa kagamhanan sa lalawigan bahin sa coal ash kon abo sa carbon nga komprahon sa nahauna gikan sa Korean Power Corporation-Salcon Power Corporation (KEPCO-SPC).

Kini maoy nasabotan atol sa tigom nga gipatawag ni Gobernador Gwendolyn Garcia uban sa mga opisyal sa CEMEX ug sa KEPCO-SPC didto sa buhatan sa gobernador   sa miaging adlaw.

Ang abo sa Carbon sa Colon, Naga giingong nakahatag og nagkalainlaing sakit sa katawhan sa maong dapit.

Pipila sa maong balatian mao ang sakit sa panit, hubak ug uban pa.

Apan karon nga may kompaniya nga mogamit niini aron isagol nga engrediente sa semento, nalipay kaayo ang taga Naga ug labaw sa tanan ang kagamhanan sa lalawigan.

Usa usab kini sa gipangayo sa kagamhanan sa lalawigan gikan sa Kepco-SPC nga kinahanglang may kalabayan silang permanenting lugar sa ilang abo aron dili kini maghatag og risgo sa panglawas sa katawhan.

Kay ang kapakyas nila sa paghipos niini, magkahulogan usab sa pagpahunong sa kagamhanan sa ilang operasyon. (WC) BANAT NEWS