DSWD mohinabang sa taga sidewalk

CEBU, Philippines – Gitinguha sa kagamhanan nga kahatagan og panginabuhi ang mga nagpuyo sa mga aseras pinaagi sa programa nga gitawag nga Modified Conditional Cash Transfer (NCCT).

Ang maong programa dumalahon sa Department of Social Welfare and Development (DSWD) 7 kansang tumong mao ang pagdani sa atensyon sa mga pamilya nga walay permanenteng pinuy-anan kinsa anaa na lang mangatulog sa aseras .

Nasuta sa kagamhanan nga ang maong mga molupyo wala gayuy ikapatukod og balay kay gani maglisud sila sa ilang makaon adlaw-adlaw.

Gibutyag ni Regional Director Ma. Evelyn Macapobre nga may gisumiter siya nga duha ka proposal kalabot niining maong programa ngadto sa ilang kadagkuan sa Manila ug nga gipaabot na lamang kini nga pirmahan aron kasugdan na kini pagpatuman sa sunod bulan.

Sulod niining maong programa ang mga non government organization (NGO) nga maoy nag-atiman sa mga street children ug sa mga ginikanan niini nga libod suroy sa kadalanan maoy mo-pa-screen niini ngadto sa mga opisyales sa DSWD kay sila may ahensya nga  gitugyanan sa kagamhanan sa pagpang-apod-apod sa hinabang ngadto sa mga kabus.

Samtang si Jaybee Binghay, ang tigpamaba sa DSWD7 mibutyag sa Banat News nga kining maong hinabang ipang-apod-apod duha ka semana matag bulan aron gayud masiguro nga adunay magamit ang mga kabus nga anaa lamang manimuyo sa mga sidewalk.

Hinuon iyang giklaro nga lahi gayud kini sa Pantawid Pamilya Pilipino Program diin ang matag balay gituyo gayud pag-screen sa mga opisyales sa DSWD aron masuta kun kinahanglan ba gayud nga hatagan sila sa pinansyal nga hinabang. (WC)BANAT NEWS