Piyado naghikog tungod sa nerbyos

CEBU, Philippines – Patay na nga napalgan ang usa ka piyado sa usa ka cooperative building kinsa naghikog gumikan sa sakit nga nerbyos didto sa barangay Cabonga-an, lungsod sa San Francisco sa miaging gabii

 Ang nakabsan sa kinabuhi nailhan nga si Ebagrio Wenceslao, 57, molupyo sa maong lugar, kinsa maoy piyado sa building nga iya sa Sacasuese Cooperative.

Sumala sa kapolisan nga nasayran nila ang maong hitabo human modangop sa ilang buhatan si Dexter, pag-umangkon ni Wenceslao ug misumbong kalabot sa paghikog sa iyang uyoan.

Dihang gisusi sa kapolisan, nasuta nila ang maong hitabo ug sila na ang mitangtang sa electrical wire nga maoy gihikot sa liog ni Wenceslao kansang pikas tumoy gigaid sa sagbayan sa edipisyo.

Nasuta sa kapolisan nga dugay na nga nag-antos si Wenceslao sa iyang sakit nga nerbyos ug mao kini ilang gituohan nga maoy hinungdan sa iyang paghikog

Gisuwayan og dala sa kapolisan ngadto sa Ricardo Maningo District Hospital sa maong lungsod apan wala na kini maulii.

Matud sa kapolisan nga wala silay nakitang foul play sa kamatayon niini ug wala usay tawo nga misulod sa lawak diin siya maghigdaan nga maoy mahimong pasanginlan. (WC)BANAT NEWS