CEBU, Philippines – Aksidenteng nakuykuyan sa mga trabahanteng nagtukod og covered court sa Kawit Elementary School sa lungsod sa Medellin ang giingong mga bukog sa tawo nga gituohang panahon pa sa mga Espanyol.
Ang hitabo gipahibalo dayon ngadto kang Medellin municipal planning and development officer Giles Anthony Villamor kinsa mitawag dayon kang Professor Jojo Bersales, ang Capitol consultant on museum affairs.
Sumala pang Bersales pag-abot niya sa site duna nay mga bangag alang sa poste sa maong tukorong covered court samtang ang mga bukog sa tawo diha gibutang sa mga plastic drum apan gihunong una ang pagtrabaho.
Dunay nakit-ang mga banga, olive-glazed celadon bowl sa tupad sa mga bukog sa ilawom sa duha ka metros nga gilawmong bangag. Giingong nagkadaiya ang posisyon sa mga bukog dihang kini nakuykoyan nga daw dinalian ang paglubong kanila.
Gituohang ang usa sa bukog iya sa lalaki ug gibanabanang 30 anyos kini. Giingong dose ka tawo ang gilubong sa maong dapit. Dunay mga pagduda ang mga residente nga bukog kini sa mga sundalong Amerkano niadtong Ikaduhang Kalibutanong Gubat tungod kay dagkoon kini.
Apan nagduda si Bersales niini tungod kay ang ubang bukog sa tiil nga migimaw sa drum dili kini iya sa tag-as nga tawo.
Nasurpresa usab si Bersales nga dunay dakong Binga o Bailer shell nga limpyo kaayo ang pagkalugit sa ilawom nga daw gigamit isip panglimas sa tubig sa baroto nga parehas sa nakuha nila sa laing historical burial site sa San Remigio. (EIM) BANAT NEWS