Outstanding nga kawani nakadawat og P3 mil

CEBU, Philippines - Ang mga kawani ug opisyal sa kagamhanan sa dakbayan sa Mandaue nga nagpakita og katakus sa ilang serbisyo gipasidunggan ug gihatagan og pahalipay nga tag-P3 mil matag usa atol   sa kasaulogan sa ika- 43 nga Charter Day Anniversary sa maong dakbayan sa miaging gabii.

Ang gipasidunggan mao sila si Engineer Dario Mago isip outstanding department head, Engineer Marivic Cabigas isip outstanding regular employee, Rosamarie Demana nga maoy outstanding job order employee ug Wilfredo Yaun nga mao usab ang giila nga outstanding clean and green employee.

Dugang nga gipasidunggan atol sa maong kasaulogan mao si Analisa Rossel nga maoy outstanding Barangay Health Nutrition Worker (BHNW) Felipe Gervise nga maoy outstanding traffic enforcer, Gloria Baay nga maoy outstanding Day Care Worker ug Mark Tunacao nga maoy outstanding JASSU employee ug Barangay Kapitan Andres Suson sa barangay Pagsabungan nga maoy outstanding punong barangay sa dakbayan.

Ang laing nakadawat og pasidungog mao sila si Josepina Rosa sa barangay Tabok nga napili usab isip outstanding barangay kagawad, Gina Muana nga barangay secretary sa barangay Tabok nga mao usab ang outstanding barangay secretary, Rodulfo Lepiten sa barangay Maguikay nga mao usab ang outstanding barangay tanod karong tuiga.

Ang deputy director for operation sa Mandaue City Police Office (MCPO) nga si Superintendent James Goforth   lakip usab sa gipasidungdan sa maong kasaulogan karong tuiga nga maoy nahimong outstanding commissioned police officer, SPO4 Sergio Tomaquin nga maoy outstanding non-commissioned police officer.

Gipasidunggan usab atol sa programa sa maong kasaulogan sila si Louela Guerero sa Bakilid Elementary School nga maoy outstanding elementary school teacher, Vie Ryan Amamangpang sa Mandaue City Science High School nga maoy outstanding public high school teacher sa maong dakbayan.

Si Erlinda Balansag nga maoy nagserbisyo sulod na sa 43 ka tuig sa kagamhanan sa maong dakbayan ang gihatagan usab og pasidungog kauban nila ni Police Station 3 chief nga si Sr. Insp. Wilson Abot, hepe sa Police Station 3. ( /WC) - BANAT NEWS

Grupo sa pro-life midapit kang Gwen

Ni Chester Abadilla

CEBU, Philippines - Human mabaniog ang lig-ong baruganan ni Governor Gwendolyn Garcia batok sa Reproductive Health (RH) Bill , ang grupo sa Pro Life Advocates sa Bicol region nga gipangulohan ni Brenda Locsin uban ni Dr. Rene Josef Bullecer, Country Director sa Human Life Advocates Inc. mibisita ug nakigkita sa gobernador.

Kini aron sa pagdapit kaniya sa usa ka kalihokan nga gasentro sa kampanya sa pagpalig-on sa kinabuhi uban ang pribadong sektor; kaparian; relihiyoso ug mga layko nga grupo atol sa kapistahan sa Our Lady of Peñafrancia sa ikaduhang semana sa Septembre didto sa syudad sa Naga, Bicol Region.

Si Locsin mibutyag nga gihan-ay na nila ang mga kalihukan nga tambongan sa gobernador diin nagkalainlaing sektor ang nagpaabot   nga maminaw sa ipamahayag sa gobernador sa iyang lig-ong baruganan batok sa RH Bill.

Samtang gitug-an usab ni Dr. Bullecer nga usa ka dakong pribilihiyo alang sa mga grupo sa Pro Life Advocates sa Bicol nga ilang makita ug mabati ang maong pamahayag sa gobernador nga Sugboanon.

Kini usab ang hinungdan nga gibutyag ni Dr. Bullecer ug ni Locsin nga ang grupo sa pro-life advocates hugot nga mosuporta sa tinguha ni Gobernador Garcia nga magkandidato pagka-gobernador sa umaabot nga election. ( /WC) - BANAT NEWS