CEBU, Philippines - Talandugon ang kahimtang sa usa ka tawo kinsa aksidenteng napusilan sa barangay tanod sa barangay Dungoan, dakbayan sa Danao sa miaging hapon.
Ang biktima mao si Cristopher Mecca, 27, minyo, walay trabaho ug nagpuyo sa sitio Dancar sa barangay Dungoan.
Samtang ang nakapusil kaniya mao si Conrado Jiminez, 48, ug usa ka barangay tanod sa nahisgotang dapit.
Si SPO4 Edgar Gomez sa kapolisan sa dakbayan sa Danao mibutyag sa Banat News nga sayo niini gikaaway sa biktima ang kaugalingon niyang amahan sa ilang balay.
Ang amahan nga nakamatikod nga isog kaayo ang iyang anak, nangayo og panabang sa kapolisan sa maong dapit.
Si Jiminez nga maoy gisugo sa kapolisan sa pagtubag sa maong alarma nakaabot pa sa panaglalis ni Mecca ug sa amahan niini .
Diha-diha nagpaila dayon si Jiminez nga usa siya ka tanod ug mibadlong kang Meccaapan giingong misamot og hiwasa si Mecca sa kasuko dayon misuway kini og ilog sa armas ni Jiminez.
Sa tanto nilang binunlotay, mibuto ang armas sa tanod ug napisok ang abaga ug bukton sa biktima.
Dihadiha gihatod dayon kini sa iyang mga kabanay ngadto sa Danao Provincial Hospital apan gipabalhin kini ngadto sa Vicente Sotto Memorial Medical Center sa dakbayan sa Sugbo.
Si Jiminez mitahan usab dayon ngadto sa kapolisan sa maong dakbayan. (/WC) - BANAT NEWS