CEBU, Philippines - Patay ang usa ka dispatser human kini gitabangan og bunal ug gidunggab sa duha ka lalaki pasado alas-12 sa miaging hapon atubangan sa usa ka botika sa sitio Tisa Proper sa barangay Tisa sa siyudad sa Sugbo.
Ang biktima nailhan nga si Constancio Bantiles, 39, molupyo sa Purok Sambag sa maong barangay samtang ang mga suspetsado giilang sila si Rico Ybañes ug Joseph Flores pulos molupyo sa maong barangay.
Sa pasiunang imbestigasyon sa kapolisan nasayran gikan sa igsuon sa biktima nga si Eduardo nga ang iyang igsuon nagduwa og dama uban sa mga higala dihang kalit nga nangabot ang mga suspek ug gikulata kini.
Diha-diha gikatahong gihansakan ni Ybañes sa dala niining mahait nga hinagiban ang likod sa biktima samtang si Flores nagpunay og lambos sa lingkuranan ngadto sa biktima.
Tungod niini, ang biktima daling gidala sa Cebu City Medical Center (CCMC) sa pangagpas nga matabang pa apan dihang naabot kini sa nahisgutang tambalanan gideklarar kini nga patay na.
Ang kapolisan misubay pa sa posibleng motibo sa maong krimen. ( EIM) - BANAT NEWS