SK official suspensuhon kay sige og absent

CEBU, Philippines - Gisuspenso sulod sa 90 ka adlaw ang Sangguniang Kabataan SK Federation President sa lungsod sa Tuburan tungod sa pagsige og palta niini sa sesyon sa konseho.

Ang Konseho sa Tuburan mibotar pag-aprobar atol sa regular session niini niadtong miaging Biyernes sa gidusong resolusyon alang sa pagpahamtang og 90 ka adlaw nga suspension batok ni SK Federation President ug ex-officio member Bret Monsanto.

Ang konseho una nang mipasar og resolusyon niadtong petsa 30 sa Hulyo nga nagmando kang Monsanto paghatag og katin-awan nganong dili kini angay suspensuhon o ba kaha ipatangtang sa katungdanan tungod sa pagsige og absent.

Subay sa maong napasar nga resolusyon si Monsanto kausa lang nakatambong sa sesyon gikan sa bulan sa Enero ning tuiga hangtud sa milabay’ng bulan sa Hulyo.

Ang presiding officer nga si Vice Mayor Dominador Pesiao ug Mayor Aljun Diamante nangayo og katin-awan gikan sa maong batan-ong opisyal.

Apan si Monsanto niduso og tubag sa konseho ug mipasabot sa mga hinungdan ilabi na kay atoa siya magtungha sa kaulohan ug lisod alang kaniya ang pagtambong sa sesyon matag bulan.

Matud pa nga miduso og resolusyon si Monsanto nga nag-awhag sa Konseho nga magbutang og usa ka sesyon sa adlaw’ng Sabado aron makahigayon siya og tambong kausa sa usa ka buwan.

Apan bisan pa niini gikatahong pakyas gihapon si Monsanto sa pagtambong ug miduso og suwat ang naulahi nga miinsister nga wala siya pahibaw-ang gitugutan ang iyang hangyong mag-sesyon sa adlaw’ng Sabado kausa sa usa ka buwan.

Hinoon giklaro diha sa suwat ni Monsanto nga giduso sa Presiding officer ug sa Secretary sa Sanggunian nga dili siya mo-resign sa katungdanan ug mopadayon siya pag-alagad isip ex-officio member tungod kay pinili siya sa sektor sa kabataan sa lungsod.

Tungod niini nakahukom ang Konseho niadtong Biyernes pagsuspenso kaniya, hinuon ang resolusyon gipaabot pang pirmahan ni Diamante sa dili pa hingpit ipatuman. ( /EIM) - BANAT NEWS