Pablo John uyon nga imbestigahon ang stampede sa Barili

CEBU, Philippines - Uyon si 3rd District Cong. Pablo John "PJ" Garcia nga imbestigahon sa National Bureau of Investigation -7 mahitungod sa nahitabong stampede sa lungsod sa Barili atol sa pagpang-apod-apod sa Pantawid Pamilyang Pilipino Program (4Ps) sa gobiyerno niadtong miaging adlaw aron maklaro sa tanan kun namolitika ba ang mga Garcia sa maong kalihukan.

Giklaro ni Garcia nga sa pagkabuntag niadtong adlawa diin nahitabo ang maong stampede sila si Gov. Gwen Garcia ug iyang amahan nga si 2nd District Cong. Pablo Garcia ug mga kaubanan may gitambongang kalihukan sa lungsod sa Dumanjug ug usa na niini mao ang pang-apod-apod og mga school supplies alang sa mga tinun-an ug mga magtutudlo sa elementarya sa Dumanjug.

Gipasabot usab niini nga ang ilang katuyuan sa lungsod sa Barili sa pagkahapon nianang adlawa mao man ang pag-inagurar sa bag-ong legislative building ug dili ang pagtambong sa distribution sa 4Ps sa DSWD nga gipahimutang sa gym sa barangay Guimbuwangan sa lungsod sa Barili.

Sigon pa ni Garcia nga sukad na sukad wala gyud siya mitambong sa pagpang-apud sa 4Ps bisan pa man sa imbitasyon sa DSWD sanglit wala siya makauyon sa katuyoan niini.

Gipasabot usab ni Garcia nga wala siya mosagop sa katuyuan sa mga programa nga naghatag og kwarta sa mga tawo kay mas maayo pang hatagan sila og livelihood project aron sila mokita.

Giawhag usab ni Garcia ang mga sakop sa media nga susihon una og maayo ang impormasyon ug dili dayon mamasangil sa ilang pamilya.

Samtang gipaabot usab sa usa sa mga board members sa Cebu CFI community Cooperative nga si Atty. Lito Astillero nga adunay pagtugot sa DSWD-7 ang ilang pagpahigayon sa distribution ngadto sa Guimbuwangan gym sa lungsod sa Barili kay dako ug hamugaway man kini nga lugar.

Gani matud pa ni Astillero nga sa tanang nangaging distribution sa 4Ps pinaagi sa CFI puro man hapsay. ( /EIM)   - BANAT NEWS