Gwardiya, drayber sa habalhabal gipamatay

CEBU, Philippines - Gwardiya ug habal-habal drayber ang gipamusil patay sa lima ka wala mailhing tawo sa managlahing oras ug lugar sa dakbayan sa Sugbo.

Kagahapon sa kaadlawon napalgang wala nay kinabuhi ang gwardiya sa MHR Warehouse sa dalan Humabon, sitio Tabay, barangay Carreta nga si Melvin Emoy, 49.

Si Emoy sakop sa Gradelock LSIA Employees Multi-Purpose Cooperative Security Agency ug kasamtangang nadestino sa maong establisamento ug molupyo kini sa La Paloma Village, sa barangay Tisa ning dakbayan.

Sa imbestigasyon sa kapolisan nasayran nga nagbantay kini apan nianang pagkakaadlawon na kalit lang nga adunay duha ka wala mailhing tawo nga kalit nga mipusil sa nawong sa biktima.

Tuod man, dihang natumba ang biktima daling misibat ang mga mamumuno palayo sa maong lugar, gisalikway dayon nga “agaw-armas” ang motibo sa pagpatay sanglit sa paghiling sa patay’ng lawas niini nakit-ang giluklok sa iyang hawakan ang .38 caliber revolver niini.

Nasayran usab sa kapolisan nga sa milabay’ng semana adunay grupo sa gibuyag ang biktima nga mga batan-on dihang nasakpan kini nga nanulis apan gikatahong gibaharan sa grupo ang biktima.

Sa pakighinabi sa Banat News ni SPO1 Ruth Bongo-Violanggo sa Homicide Section sa Cebu City Police Office mibutyag kini nga ila usab nga gikonsiderar ang pagpamahad sa mga batan-on.

Samtang usa ka habal-habal drayber ang gipaulanan usab og bala sa tulo ka wala mailhing tawo pasado alas-10 sa miaging gabii sa Inayawan Proper, sa barangay Inayawan.

Ang biktima nailhan nga si Allan Baluyos, 20, molupyo sa sitio San Antonio de Padua sa maong barangay. Sa pasiunang imbestigasyon sa kapolisan nasayran nga ang biktima nagbaklay gikan sa sitio Kulo dihang gisundan sa mga mamumuno ug kalit nga girakrakan.

Dihang natumba na ang biktima giusban kini og pusil sa usa sa mamumuno ug mipasirit palayo balik sa ilang giagian diha sa sitio Kulo.

Sa pakighinabi sa Banat News ni Violanggo posibling personal nga panagbangi ang motibo sa maong pagpamusil apan wala usab nila gisalikway ang anggulo sa illegal nga drugas.

Butyag usab niini nga ilang nasayran gikan sa mga tanod sa barangay nga adunay bati nga rekord ang biktima sa ilang barangay susama sa reklamo sa pagpangawat ug snatching. ( /EIM) - BANAT NEWS