Lisensya ni Bahinting dili pa expired-CAAP

CEBU, Philippines - Giklaro sa Civil Aviation Authority of the Philippines (CAAP) kagahapon nga kompleto sa papeles ang nahagsang Piper Seneca plane sa Masbate ingon man dili expired ang mga lisensya ug ang chartered flight niini.

Si CAAP director general William Hotchkiss III nagkanayon nga base sa ilang Civil Aviation Safety Oversight Reporting and Tracking System (CASORT) database, ang maong abyon nga gisakyan ni anhing Interior and Local Government Secretary Jesse Robredo gi-piloto ni Capt. Jessup Bahinting ug kini may air taxi license nga balido kutob Nobiyembre 14, 2012.

Dugang pa ni Hotchkiss ang CASORT data nagpakitang ang mga lisensya sa pagka-flight instructor ug commercial pilot ni Bahinting nga parehong giisyu niadtong Abril 30, 2012 balido kutob sa Marso 2013, duna kini rating o pagtugot nga makapalupad og single engine o ba kaha multiple engine nga mga abyon. Ang nahagsang Piper Seneca dunay duha ka makina.

Ang pagklaro ni Hotchkiss sa maong isyu gihimo sa CAAP tungod sa mga nahaunang report nga gikutlo gikan sa mga wala magpailang sakop sa CAAP nga expired na ang lisensya ni Bahinting, kini kusganong gisupak sa Aviatour Air ang kompanyang gipanag-iya ni Bahinting.

“It was inopportune that some personnel in CAAP not cleared administratively to issue official statements are circulating pure and baseless speculations,” pasabot pang Hotchkiss kalabot sa maong mga kawaning nagpa-interbyu sa media.

Matud pa niya ang CAAP employee nga gidudahang maoy nagpakatap sa maong sayop nga report kasamtangan na karong gipailawom sa imbestigasyon tungod sa kasong administratiba.

Base sa CASORT, ang Aviatour Air Flying School license mi-expire niadtong Agosto 29, 2012 o duha ka semana sa wala pa mahitabo ang aksidente.

Matud pang Hotchkiss ang tuong makina sa maong abyon dad-on sa Manila gikan sa Masbate karong Sabado ug Domingo aron kini pisa-pisahon og susi sa Special Investigation Committee sa CAAP.

“We are committed to conduct a thorough, comprehensive and impartial investigation of the plane incident,” matud pang Hotchkiss. “We intend to provide accurate, validated information on the progress of the inspection based on the committee’s findings.”

“We appeal not to make a circus out of this incident and muddle the investigation with baseless and unwarranted speculations. This will not help CAAP’s impartial and transparent investigation process,” pasabot pa ni Hotchkiss.

Gipaabot nga maabtan og usa ka buwan una pa mogawas ang pasiunang resulta sa imbestigasyon ug dugang duha ka buwan aron makompleto ang ‘final report’ sa imbestigasyon nga ilang isumitir kang Presidente Benigno Aquino III, sumala pa ni Hotchkiss sa report sa TV Patrol Central Visayas.

Kagahapon, ang Aviatour Air hangar gisusi na sa mga sakop sa CAAP alang sa gihimong imbestigasyon ug misumitir na sa ilang mga dokumentos ang maong kompanya. ( EIM) - BANAT NEWS