Hostagetaker ipahiling kung 'buang'

CEBU, Philippines - Kasong kalapasan sa Republic Act 7610 o Child Abuse in relation to serious illegal detention ang gipasakang kaso batok sa batan-ong gituohang adunay sakit sa pangisip nga mi-hostage sa 7-anyos nga batang babaye niadtong Miyerkules sa buntag sa CRCI Compound barangay Apas. Ang hepe sa kapolisan sa syudad sa Sugbo Sr. Supt. Melvin Buenafe mipadayag nga ilang kasohan si Paul Guigie sa maong insidente karong adlawa human unya sa psychiatric examination ngadto sa suspek.

Mipasabot si Buenafe nga nalangay ang ilang pagpahigayon og psychiatric examination ni Guigie tungod usab kay ila pang gipaabot ang ginikanan niini nga silang Paulino ug Berbelita gikan sa Bohol.

Matud pa ni Buenafe nga ang kasayuran nga ilang makuha gikan sa ginikanan ni Guigie ilang masayran ang history niini.

Butyag usab ni Buenafe nga kun mapamatud-ang aduna gyuy deperensiya sa pangisip ang suspetsado mangayo sila og clearance sa prosecutors office aron dad-on kini sa usa ka mental institution. Kahinumduman nga niadtong Miyerkules sa buntag kalit lang nga gisignit sa suspetsado ang 7-anyos nga batang nagkalingaw og duwa sa ilang tugkaran ug gi-hostage kini sa rason nga adunay mopatay kaniya ug sa iyang ginikanan. ( /EIM)   - BANAT NEWS