Libud-suroy sa kadalanan suportahan sa gobiyerno

CEBU, Philippines - Tungod sa tinguha nga katabangan ang mga tawo nga anaa lamang manimuyo daplin sa kadalanan, ang Department of Social Welfare and Development (DSWD) 7 nag-umol og usa ka programa nga Modified Conditional Cash Transfer.

Tumong niini nga mahatagan og atensyon ang mga pamilya nga walay permanenteng pinuy-anan kung diin anaa lang mangatulog daplin sa kadalanan matag gabii tungod kay walay kwarta alang sa pagpatukod og ilang kaugalingong panimalay.

Gibutyag ni Regional Director Ma. Evelyn Macapobre kagahapon sa mga grupo sa tigbalita nga anaa na siyay gisumiter nga duha ka sugyot kalabot niining maong programa sa ilang kadagkuan ug nga gipaabot na lamang kini nga pirmahan aron kasugdan na kini sunod bulan.

Sulod niining maong programa ang mga Non-Govermental Organizations nga naghupot na og mga street children o mga   libod suroy lamang sa kadalanan kinahanglang magpa-screening sa DSWD tungod kay anha nila ipaagi ang iapod nga hinabang kung diin sila na lamang usab unya ang mopaabot niini ngadto sa ilang gihuptan nga mga kabos nga mamahimong benepisyaryo unya niini.

Sumala pa usab ni Jaybee Binghay nga tigpamaba sa DSWD sa Banat News nga kining maong hinabang ipang-apod-apod duha ka semana matag bulan aron masiguro nga adunay magamit ang mga kabos nga anaa lamang manimuyo sa kadalanan. ( EIM) BANAT NEWS