Wala mo-remit sa P130 mil gireklamo

CEBU, Philippines - Gireklamo ang usa ka salesman sa management sa gitrabahoan niining kompaniya human kini pasanginling midispalko og P130 mil nga koleksiyon sulod sa usa ka semana gikan sa halin sa ilang mga produktong sabon sa lungsod sa Argao niadtong Martes sa alas 3:00 sa hapon.

Ang gireklamo mao si Benjamen Estanero, taga barangay Suba, Argao ug salesman sa Wellamde Manufacturing Corporation nga nagbase sa 888 Plaridel St., Mandaue City.

Samtang ang misang-at niya og reklamo mao si Eric Alquiza ang district sales manager sa maong kompaniya.

Matud ni PO2 Dionisio Trumata sa Argao Police dihang nahinabi sa Banat News subay sa inisyal nga imbestigasyon ang gireklamo salesman sa maong kompaniya ug matag Sabado mo-report gyud unta kini sa ilang opisina sa Mandaue aron pag-remit sa koleksiyon ug halin niini sa mga produkto. Apan naabtan na lang og Lunes wala kini mopakita.Tungod sa kahibulong milarga si Alquiza sa Argao ug didto iyang naabtan si Estanero sa barangay Suba nga hubog ug nakig-inom sa mga barkada.

Dihang ilang gipangutana bahin sa halin niini gikatahong nangatarungan kini nga ang kwarta anaa ra sa cashbox sulod sa van hinungdan nga gidala nila ang sakyanan didto sa giabangang lodging house sa Lamakan, Argao ug dihang ilang gibuksan walay sud nga kwarta.

Matud pa dihang ilang gikomprontasi si Estanero mipasalig kining mobayad pagka-Martes apan wala kini mopakita hinungdan nga ilang gireklamo ug gipa-blotter sa kapulisan tungod kay bisan ang cellphone niini dili na usab makontak.

Desididong mopasaka og kaso sa korte ang kompanya batok sa maong kawani. ( /EIM) BANAT NEWS