Bala miungot sa 3 pa ka bulang masuso

CEBU, Philippines - Miungot ang bala sa ulo sa tulo pa ka bulang bata nga gituohang naigo sa saag nga bala gikan sa armas nga wala pa matino ang kalibre alas-7 pasado ang takna sa miaging gabii sa Sector 2, barangay Pagsabungan, dakbayan sa Mandaue nga dali kining gihatod sa iyang inahan ngadto sa tambalanan.

Si SPO1 Gregorio Cabizares sa kapolisan sa Presinto 3 sa Mandaue City Police Office (MCPO) nga nagbase sa barangay Basak sa maong dakbayan miila sa biktima nga mao si Mcdenzel Dumadapat nga anak ni Carmel Dumadapat nga nagpuyo sa maong dapit.

Dugang pa niya gibiyaan sa inahan ang biktima sa sulod sa lawak sa ilang panimalay kay kini nanihapon sa kusina.

Nadunggan na lang dayon sa inahan ang hilak sa anak maong gidali niya kini og susi ug sa iyang pagsapwang nagkadugo na ang ulo sa anak.

Matud pa ni Cabizares gidala sa inahan ang bata sa Eversely Child Sanitarium General Hospital sa barangay Jagobiao kuyog sa pipila niini ka mga silingan ug dihang gisusi sa mga doktor ilang nasuta nga nag-ungot sa ulo sa bata ang bala sa wala pa matinong kalibre sa armas. Ang bata gitakdang dad-on sa Vicente Sotto Memorial Medical Center sa dakbayan sa Sugbo tungod kay nagkinahanglan kini og dinalian nga operasyon. (/EIM)

Unom ka polis nga mikiskis sa priso ikiha

Ni Ria Mae Booc

Unom ka polis sa Sogod Police Station lakip na ang hepe niini ang mag-atubang oug kasong administratiba human nakita sa National Police Commission-7 nga adunay probable cause aron sila kasohan tungod sa pagkiskis sa mga buhok ug balahibo sa usa sa ilang mga dinakpan nga si Danny Montecalvo, 39.

Kasong grave misconduct ug serious irregularity in the performance of duty ang gipasaka nila ni PO2 Dario Dinopol, PO2 Jose Riden Hortilano, PO1 Roel Pepito, ug PO1 Lamberto Lobiano Jr.

 Laing kasong serious neglect of duty ug grave misconduct usab ang gipasaka nila ni Sr. Insp. Aldrin Villacampa ug jailer PO2 Jose Rospel Hortilano.

Si Montecalvo naaresto sa kasong paghubog-hubog niadtong Hulyo 28 human kini giingong nag-wild matud pa sa amahan niini nga si Baudencio Montecalvo.

 Daling miresponde ang upat ka polis apan giingong gisikaran ni Pepito si Montecalvo human giingong misuway og sukol sa kapulisan ug gidala sa prisohan diin kini giupawan sa mga piniriso.

Si Atty. Zandro Ronnie Oriol, public information officer sa NAPOLCOM-7, nagkanayon nga base sa ebidensiya lakip na ang medical certificate ni Montecalvo nagpakita nga adunay probable cause. Matud ni Oriol migamit og sobrang kusog ang kapulisan dihang ilang gidakop si Montecalvo. Giingong gisikaran usab kini sa makaduhang higayon.

“The kick was delivered when Danny was raising his hands to surrender but the police kicked him,” matud ni Oriol.

Sa Section 4 paragraph b (10) of RA 9745 or Anti-Torture Act of 2009 stripping the person naked, parading him in public places, shaving the victim’s head or putting marks on his body against his will can cause mental and psychological torture.”

Matud pa ni Oriol nga si Rospel mitug-an nga adunay house rules ang prisohan nga buot ipasabot nga dugay rang nakahibalo si Villacampa niini apan wala hatagig pagtagad.

“House rules kuno pero kahibalo sila nga naa na nganong wala man nila hunonga,” sigon ni Oriol. Ang summary hearing sa maong kaso gikatakdang magsugod sunod buwan. ( EIM)  BANAT NEWS