Bata gi-hostage sa adik

CEBU, Philippines - Usa ka lalaking gituohang adunay sakit sa pangisip ang nang-hostage og 7-anyos nga batang babaye didto sa CRCI Compound, barangay Apas dakbayan sa Sugbo kagahapon pasado alas 9:00 sa buntag.

Si Paul Guigie, 25, lumad nga taga Tawala, Panglao, Bohol, maoy mi-hostage sa bata nga nagtungha sa Grade 2. Si Jessan Lloveras, iyaan sa biktima misaysay sa mga tigbalita nga nagduwa ang biktima sa tugkaran sa ilang balay dihang kalit lang kini nga gisignit sa suspetsado dayon gitionan og icepick ug mihulga sa mga silingan nga iyang samaran ang biktima kun dili ihatag kaniya ang iyang gipangayong kuwarta.

Matud pa ni Lloveras nga gusto ang suspetsado nga mouli sa Bohol apan walay pamasahe.

Si Sr. Supt. Ramon Buenafe kinsa nangunay sa pakighinabi sa suspek ug mipakalma niini mibutyag nga iya kining gi-agni nga motan-aw sa iyang mga mata aron kini makapaminaw sa iyang estorya hangtud nga nahiduol siya niini.

Unya iya dayong gikuptan ang kamot nga naggunit sa ice pick ug dihang iya kining nailog wala na makalihok ang suspek kay gilibotan dayon siya sa kapolisan nga sakop ni Buenafe. Si SPO1 Ruth Violanggo sa Homicide Section sa Cebu City Police Office, kinsa usa sa mitabang sa bata mipahigayon dayon niini og oxygen tungod kay naglisod kini sa pagginhawa gumikan   sa kahadlok. Mihilak kini pag-ayo ug nangluspad ug mikalma kini dihang nahiabot ang iyang amahan. Matod pa ni Violanggo nga ipaubos pa sa debriefing ang bata tungod sa trauma nga nasinati niini.

Samtang ang suspek ipaubos usab sa psychological test.Kasamtangang gitun-an sa kapolisan kun unsa nga klase sa kaso ang ilang isang-at tungod kay mag-agad man kini sa resulta sa psychiatric examination kaniya.   /WC   BANAT NEWS