2 anyos gihapos patay

CEBU, Philippines - Patay ang usa ka 2-anyos nga batang lalaki human kini ihapos sa usa ka giingong drug addict nilang silingan sa barangay Biasong, dakbayan sa Talisay niadtong Martes sa hapon.

Ang biktima mao si Jeffrey Abusejo Jr., residente sa maong dapit kansang ulo miliki ug nalupyak   nga maoy hinungdan sa kamatayon niini.

Ang suspetsadong si Kienner Baller, 35, nasikop nila ni PO3 Achilles Cabando ug PO3 Raul Torregoza human sa maong hitabo.

Ang igsoon ug bayaw sa suspetsado nga sila si Ruth Saniel, 34 ug Christina Baller, 53 mibutyag nga si Kienner taud-taud na nga nagumon sa ginadiling drugas.

Sa wala pa ang hitabo, ang bata uban sa mga pag-umangkon sa suspetsado nagduwa-duwa sa agianan dihang si Kienner miagi ug giingong nasaghiran sa bata.

Gumikan niini mihiwasa sa kasuko ang suspek ug gikuptan sa duha ka tiil ang bata, dayon gihapos sa makadaghan sa karsada .

Wala pa kini matagbaw gipaak pa ang tuong bahin sa liog sa bata. Ang inahan sa bata daling mitabang apan giingong gitukmod kini sa suspetsado.

Si Jeffrey Sr. ang amahan sa biktima, kinsa trabahante sa surplus shop sa maguwang ni Kienner didto sa likod sa ilang balay niadtong higayona nagpaayo sa ilang TV.

Matud ni Jeffrey nga nabati niya ang iyang asawang misinggit og pakitabang samtang nagsapnay sa biktima nagtinga-tinga. Gidala dayon nila ngadto sa Talisay City District Hospital ug gibalhin ngadto sa Vicente Sotto Memorial Medical Center diin didto ideklarar nga patay na. Samtang ang suspetsado miuli sa ilang balay ug giablihan ang tangke sa gasul unya miadto sa dagat nagduwa-duwa sa bas nga sama sa walay nahitabo ug miuban usab kini nga wala moreklamo sa mga polis nga misikop kaniya.

Si Ruth nagkanayon nga si Kienner usa ka seaman kaniadto apan wala makaabot og duha ka tuig ang pagpanakay niini og barko tungod kay napagan sa pagkataktak sa gitrabahoan niining barko.

Sa milabay’ng tuig matud ni Christina gipasulod nila sa rehabilitation center si Kienner sulod sa unom ka buwan apan paggawas niini giingong mibalik kini sa iyang bisyo.

Matud usab ni Christina nga human ihapos niini ang bata, iya kining gipangutana ug igo lang kining miingon nga “kan-on ko sa alien maong giunhan nako Manang … dali kaayo ko mahurot kung mausap ko sa alien Manang”.

Gibutyag ni Christina nga magyaw-yaw si Kienner ug moingon nga mga alien sila, unya magpunay kini og yaw-yaw nga gipadautan siya unya dunay laing tawo nga nagpuyo sa balay sa iyang igsoong babaye, dunay kapri ug duwende.

Si Inspector Margienette Yosores, hepe sa Women and Children Protection Desk (WCPD) sa TCPS nagkanayon nga ang korte na maoy mohukom ni Kienner kinsa nagtingkagol karon sa prisohan kung ipadala ba kini ngadto sa rehabilitation center. (/WC) BANAT NEWS