CEBU, Philippines - Si Mayor Michael Rama mipasidaan sa publiko sa dili paghimo og maot nga pagduda kalabot sa kahimtang sa lisensya sa Aviatour Aviation (AA) ug sa tag-iya niini nga si anhing Pilot Capt. Jessup Bahinting.
Nagkanayon ang mayor nga wala pa mahuman ang imbestigasyon niini busa wala siya mahimuot sa giingong usa ka tinubdan nga taga Civil Aviation Authority of the Philippines (CAAP) kinsa mipasangil nga matud pa wala ma-renew ang lisensya ni Bahinting apan nasayran sa miaging adlaw nga dili diay tinuod ang unang nigawas nga balita.
“Dili unta mag-una una og estorya, kay wala pa nahuman ang investigation, dili man maayo nga aduna na’y manggawas nga estorya nga dili mao,” sumala pa sa mayor.
Masaligon ang mayor sa pagkatawo ni Bahinting busa wala siya magduha-duha sa paghatag og award niini sa miaging adlaw.
Sayo niini gipadayag ni kalihim Manuel Roxas II sa Department of Transportation and Communications (DOTC) nga dili tinuod ang migawas nga balita nga kuno nabahas na ang lisensya ni Bahinting sa pagmaneho sa iyang abyon niadtong adlaw sa pagka-disgrasya niini.
Unya nasuta nga unya pa diay sa sunod tuig ma-expire ang iyang lisensya busa dili gayud angay tuohan ang mga migawas nga taho ug giisip kini nga mga intriga.
Samtang napuno sa mga luha ang mga mata sa mga tawo nga mihatud sa lubong ni Bahinting sa miaging adlaw didto sa lungsod sa Ginatilan.
Kaubang nagbaha mao ang mga tinun-an ni Bahinting gumikan kay dili gyud nila malimtan ang mga kaayohan nga nahatag sa mitaliwan nga piloto kanila.
Nasayran nga adunay mga higayon nga si Bahinting mismo ang motabang sa pagpanghatud og mga relief goods kung adunay mga kalamidad nga moigo sa mga kasilinganang dapit sa Sugbo. (\WC) - BANAT NEWS