Lalaki nagpaligis sa trak pisat

CEBU, Philippines - Usa ka wala mailhing lalaking gituohang adunay sakit sa pangisip ug gidudahang mituyo pagpaligis ang namatay sa miaging hapon diha sa kadalanan sa South Road Properties ning dakbayan sa Sugbo.

Ang maong lalaki gibanabanang nagpangidaron og 20-anyos ngadto 25-anyos, adunay gitas-ong 5’5 ug nagsul-ob og puting t-shirt ug gray nga shorts. Sa pakighinabi sa Banat News ni City Traffic Investigator SPO4 Ramon Budiongan nga ang drayber sa nakaligis nga trak nga si Efren Impas padulong sa syudad sa Talisay dihang gikatahong kalit milabang ang maong lalaki.

Misuway unta pag-brake si Impas apan nadasmagan gyud ang maong lalaki. Si Impas nga nahinabi sa Banat News mibutyag nga sa layo pa nabantayan na niini ang maong lalaki nga nagbarog sa tuong bahin sa dalan.

Apan dihang duol na siya kalit kining milabang sa tunga ug dihang iyang gilihayan mipatunga gihapon kini sa trak.

‘Mahug gyud nga gituyo to niya og paligis kay milikay ‘ta ko pero misabay pud siya kun asa ko liko,” matud pa ni Impas.

“Naa siguro na siyay deperensya kay ang drayber sa motor nga nakaagi nako miana man nga ‘Bay diretso na lang kay buang nang tawhana’,” matud pa ni Impas.

Human niini milahos siya sa Waterfront Police Station ug mitahan. Hangtud ning pagsuwat sa balita wala pa mailhi ang maong lalaki. ( /EIM)   - BANAT NEWS