Giluba sa iyang manghud samdan

CEBU, Philippines - Samdan ang usa ka 21 anyos nga lalaki human dunggaba sa iyang manghod nga may deperensya sa pangisip didto sa dakbayan sa Bogo sa miaging hapon.

Si PO2 Rosalie Arnoco sa womens’ desk section sa kapolisan sa maong dakbayan nga nahinabi sa Banat News miingon nga ang managsoon kansang mga ngalan gipugngan mao ray nahabilin sa ilang balay sa maong higayon.

Matud pa ni PO2 Arnoco nga sa wala pa ang pagpanunggab buot unta nga mogawas sa ilang balay ang manghod dihang gipugngan kini sa biktima kay dili pagawason.

Gumikan sa pagpugong kaniya sa iyang maguwang wala na kini mogawas ug mihigda kini sa iyang lawak.

Apan pipila ka gutlo ang milabay, nakurat na lang ang biktima dihang mibangon ang iyang manghud nga nagdala og kutsilyo paingon kaniya kansang dagway masuk-anon kaayo.

Busa samtang nagkaduol ang suspetsado ngadto sa biktima gipangutana kini sa naulahi unsaon niya ang kutsilyo.

Apan wala kini motingog ug mideretso paghansak sa kutsilyo sa lawas sa biktima sa makadaghang higayon.

Human samad-samari sa nagkalainlaing bahin sa lawas ang biktima midagan paingon sa gawas ang suspetsado ug mibiya sa ilang balay.

Gihatud dayon ngadto sa Danao District Hospital ang biktima apan gibalhin kini ngadto sa Vicente Sotto Memorial Medical Center sa dakbayan sa Sugbo

Ang kapolisan ug ang mga ginikanan sa maong managsoon padayon pa karong nangita sa suspetsado kinsa wala na mouli human niya lubaa ang iyang maguwang.  (BANAT NEWS)