Gwen mihatag og 8 ka multicab sa Danao

CEBU, Philippines - Mikabat sa P916 mil ang balor sa walo ka mga multicab nga giapud-apod ni Governor Gwendolyn Garcia sa syudad sa Danao sa miaging adlaw.

Kini agi og suporta sa mga programa sa maong syudad ubos sa administrasyon ni Mayor Ramon Durano Jr. ug ayuda usab sa unom ka mga barangay kinsa mipatuman usab sa mga programa sa lalawigan sa Sugbo.

Gitug-an ni Felixberta Gelicame, ang Project Development Officer sa Provincial Planning and Development Office (PPDO) nga nadawat na sa mga nahisgotang barangay ang mga naasoy’ng multicab.

Sayo niini nanghatag na og multicab ang gobernador ngadto sa ubang mga barangay ug kalungsoran ug mga dakbayan sa lalawigan agi usab og pagtuman sa gisaad niini nga iya gayud nga hatagan ang tanang dapit og mga sakyanan.

Kini aron may magamit sila sa panahon sa emerhensya.

Alang sa gobernador ang mga multicab gikinahanglan kaayo sa mga lugar nga nihit og sakyanan kansang molupyo walay laing masangpit gawas sa ilang mga opisyal sa barangay sa panahon sa katalagman. (BANAT NEWS)