CEBU, Philippines - Naangol ang batan-ong lalaki human kini pusila sa giingong anak sa polis didto sa rotunda sa barangay Looc, dakbayan sa Danao sa miaging tungang gabii.
Giila ni SPO2 Ildefonso Prosia sa Danao Police Station ang biktima nga si Medz Alvaro, ulitawo nga taga barangay Looc sa maong dakbayan samtang ang suspetsado mao usab si Benz Relampagos nga taga barangay Suba sa mao gihapong dakbayan nga giingong anak ni SPO3 Jose Relampagos nga nadistino sa lungsod sa Tuburan.
Matud pa ni SPO2 Prosia nga padulong na pauli sa ilang balay ang biktima nga nagsakay sa iyang motorsiklo nga gisunod sa suspetsado kinsa nagsakay usab og laing motorsiklo.
Dugang pa niya nga natumba ang motorsiklo sa biktima human maigo ang paa niini sa bala.
Sa pagtuo nga patay na ang biktima misirit ang suspetsado pahilayo sa maong lugar.
Si SPO2 Prosia miingon nga gihatud dayon ngadto sa Danao District Hospital ang biktima apan gibalhin usab dayon kini ngadto sa Vicente Sotto Memorial Medical Center sa dakbayan sa Sugbo.
Gitataw ni SPO2 Prosia nga wala magkaaway ang biktima ug ang suspetsado ug wala masayud ang biktima nganong gipusil siya niini.
Nagtuo sila si SPO2 Prosia nga gipareglahan lamang ang biktima sa maong suspetsado kinsa padayon pa karon nilang gipangita. (/WC) (BANAT NEWS)