Notadong pusher sa Pinamungajan sikop

CEBU, Philippines - Nasikop sa kapolisan ang usa ka notadong drug pusher sa lungsod sa Pinamungajan atol sa buy bust operation didto sa barangay Langub, lungsod sa Asturias niadtong Sabado sa gabii.

Ang nasikop mao si Gicer Buhia, hingkod, minyo, nagpuyo sa maong lugar ug way klarung trabaho.

Si Insp. Danilo Santillan, hepe sa Asturias Police Station mibutyag sa Banat News nga taud -taod na nilang gipanid-an ang maong suspek human kini mahilista sa ilang watchlist tungod sa pagpayuhot og shabu.

Matud ni Insp. Santillan nga tulo lang ka pakite sa gituohang shabu uban sa mga gamit sa paghingos niini, ug buybust money nga P200 ang ilang nasakmit atol sa maong operasyon.

Si Insp. Santillan miingon nga kaniadto pa untang Agosto 15 ug 16, 2012 nila sikopa ang maong suspek atol sa piyesta sa Asturias, apan gumikan sa kaabtik ug kaidlas niini wa mosaler ang ilang plano.

Nasayran nila nga binulto o dinaghan nang shabu ang gipamaligya niini sa iyang mga suki sa maong higayon.

Apan niadtong Sabado sa gabii wala makabantay ang suspek dihang si PO2 Manuel Blones maoy gihimong poseur buyer nga nagpatuong mopalit og usa ka pakite nga shabu.

Dihang migawas ang suspek sa iyang balay ug mitunol sa usa ka pakiteng shabu dungan usab sa pagdawat niini sa P200 pe nga buybust money gisignit dayun nila kini.

Mihana pa unta og lugnot ang maong suspetsado apan tungod kay gipalibotan na siya sa mga polis wala na siyay nahimo.

Gidala dayon kini ngadto sa buhatan sa kapolisan ug giimbistigar,   dayon gibalhug sa prisohan.

Nasayran nga ang maong suspek maoy nag-supply og shabu sa lungsod sa Pinamungajan ug uban pang lugar sa habagatang bahin sa lalawigan.

Karong adlawa gitakda nga ipasaka ana tukmang kiha batok kaniya   ngadto sa hukmanan. (BANAT NEWS)