Sikyu giluba ug gikuota'g P2,500

CEBU, Philippines - Samdan sa tiyan ang usa ka security guard human kini dunggaba sa usa sa upat ka tawong mipainom kaniya og bino didto sa general extension sa barangay Tejero, dakbayan sa Sugbo sa miaging gabii.

Ang biktima nailhan nga si Bernard Beneloac, 31, usa ka security guard sa Archangel Security Agency nga kasamtangang nadestino sa buhatan sa Cokaliong Shipping Lines Inc.

Sa pasiunang imbestigasyon sa kapolisan nasayran nga ang biktima gikan sa iyang trabahoan ug padung na nga mopauli sa ilang balay.

Apan sa iyang pag-abot   sa maong lugar gi-agda siya og inom sa upat ka wala hiilhing lalaki.

Tungod sa iyang kahadlok mobalibad, iyang gidawat ang baso sa alak nga gitunol kaniya apan wala na siya palakta sa maong mga tawo kinsa mi-order pa og dugang botelya sa ilimnong makahubog.

Dayon nangayo kini og kuwarta sa biktima nga ibayad sa ilang gi-order nga alak apan tungod sa pagdumili sa biktima paghatag og kuwarta, usa sa upat ka tawo misumbag kaniya ug wala pa makontento milanit kini og kutsilyo dayon gihansak   sa iyang tiyan.

Dihang natumba ang biktima gikuot sa maong mga lalaki ang iyang pitaka nga may sulod nga P2,500 dayon nag-iyahay og sirit pahilayo sa maong lugar.

Ang biktima bisan samdan sa tiyan misakay og jeep ug nakaabot gayud sa ilang balay ug ang amahan na niini maoy mihatod kaniya ngadto sa tambalanan.

Gituohan sa kapolisan nga nasugamak sa paregla ang biktima. (/WC)

 (BANAT NEWS)