Vendor sa Fuente gihinginlan

CEBU, Philippines - Gimando sa kagamhanan sa dakbayan sa Sugbo nga pabalhinon ang mga stall sa mga street vendor nga nahimutang sa palibot sa Fuente Osmeña karong semanaha isip kabahin beautification program sa siyudad ilabi na nga nagkaduol na ang mga adlaw alang sa selebrasyon alang sa kanonisasyon ni Beato Pedro Calungsod.

Sumala pa sa hepe sa Garbo Asenso Sumbanan Alyansa (Gasa) nga Dr. Lucille Mercado nga maoy gitahasan ni Mayor Michael Rama alang sa nahisgutang programa nga ibalhin sa duol sa Ramos Market, ang napulo ka sidewalk vendors nga hingtungdan.

Dugang pa niya nga himoon ang clearing operation sulod niining semanaha aron makasugod na ang siyudad sa pagpaanindot sa maong dapit. Matud pa ni Mercado nga kadaghan na nga higayon nga nagpadala sila og notisya sa mga sidewalk vendors sa maong dapit apan wala gyud siya kadawat og tubag.

Dugang pa ni Mercado nga nagpatawag na siya og mga tigom alang sa mga sidewalk vendors sa maong lugar apan giisnab lang siya niini sulod na sa duha ka higayon. (BANAT NEWS)