Lalaki giagtang sa pagpusil naangol

CEBU, Philippines - Naagtang sa saag nga bala nga nakapaangol sa usa ka tawo didto sa   dalan M.L. Quezon, sa barangay Casuntingan, sa dakbayan sa Mandaue sa miaging kaadlawon. Ang biktima mao si Alfie Antero Moniva, 29, nga lumad nga taga barangay Damulog, sa lungsod sa Sogod, ug temporaryong nagpuyo sa Casuntingan.

Matud pa ni SPO1 Renato Canja sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan   nga natulog ang biktima sa daplin sa dalan sa M.L. Quezon ug kadug ang babayeng kapuyo niini, dihang natugpahan sa saag nga bala. Si SPO1 Canja nagkanayon nga dihang ilang gisukit-sukit ang kapuyo, miasoy kini nga nahinanok siya sa pagkatulog ug nakurat nalang kini dihang pagmata niya   nagkadugo na ang agtang sa biktima.

Wala kini makabutyag kun kinsay nagpusil sa biktima tungod kay wala man siya makakita sa kriminal ug gani wala usab kini makabati sa buto sa armas nga gigamit sa pagpamusil.

Si SPO1 Canja miingon nga ilang gidala ang biktima ngadto sa Mandaue City Hospital ug nasuta sa mga doktor nga agi gayud sa bala sa armas ang maong samad sa agtang sa biktima.

Nagtuo ang kapolisan nga adunay wala hiilhing tawo nga nagpaboto sa armas sa maong dapit ug didto kini motugpa ang bala sa agtang sa biktima nga maoy hinungdan sa pagkasamad niini. (BANAT NEWS)