Ceres Bus gitulis

CEBU, Philippines - Pahibalo sa mga sumasakay og bus ingon man sa kapolisan, ang mga tulisan karon mas migrabe ug dili na jeep pasaheroan maoy ilang biktima tungod kay gi-target na nila ang mas dagkong pasaheroan sama sa bus.

Kagahapon sa kaadlawon, upat ka armadong lalaki ang mitulis sa Ceres Bus Liner ug gihurot hasta ang kinitaan sa drayber ug konduktor lakip na ang kwarta sa mga pasahero pag-abot sa Barangay Libjo sa lungsod sa Tabogon.

Ang pagtulis og bus pasaheroan dili na bag-o sa Metro Manila, apan bag-o pa kaayo kini dinhi sa Sugbu.

Usa sa mga tulisan mipabuto pa sa iyang armas aron unhan og kahadlok ang mga biktima samtang ang mga kaubanan milimas sa tanang kwarta ug kabtangan sa mga sakay.

Si Insp. Lamberto Hibaya, hepe sa Tabogon Police Station mibutyag nga ang Ceres Bus Liner nga may plakang GSJ-426 gikan sa Barangay Maya, Daanbantayan padulong sa Cebu City dihang gipara kini sa mga tulisan diha sa Barangay Binabag, Bogo City.

Matud pa ni Hibaya gibanabanang 20-anyos pataas ang mga tulisan ug ang usa nagsuot og jacket ug nagtaptap sa nawong. Duha ang milingkod sa luyo samtang ang duha diha sa tunga.

Apan dihang wala pa makadagan og layo giduol sa konduktor nga si Shene Moga ang duha sa tunga aron tiketan apan ang usa kanila mibarog ug miadto sa driver nga si Jonathan Cambungan,38, ug gitionan kini og kutsilyo.

Ang usa sa mga tulisan sa luyo kalit nga mipabuto og armas dayong deklarar og holdap, sa kahadlok gihatag ni Moga ang kinitaan nilang P5,000.

Ang pasaherong si Cleofe Dizon, 19, gikuhaan sa iyang P2,000 ug cellular phone.

Human niini nanganaog ang upat sa mao gihapong barangay ug nahanaw. Ang mga biktima igo na lang pagsumbong sa kapolisan. - BANAT NEWS