Nagpa-parlor gamit ang sakyanang red plate

CEBU, Philippines - Usa ka sakyanan nga iya sa Cebu City government gisakyan sa usa ka babaye nga miadto og beauty parlor dinhi sa dakbayan kaniadtong Biyernes.

Si Konsehal Margarita “Margot” Osmeña miingon nga ang babaye nga sakay sa sakyanan nga aduna pay logo sa City Hall wala dayon manaog pagkakita kaniya nga migawas usab gikan sa parlor.

Wala makabantay ang maong sakay sa “red plate” vehicle sa City Hall kay si Konsehal Osmeña migamit man sa iyang pribadong sakyanan. Ang private vehicle ni Osmeña adunay marka sa kilid nga “For Official Use Also.”

Si Osmeña wala hinuon motug-an kun kinsa ang nagsakay sa maong sakyanan sa City Hall nga tingali miadto sa beauty parlor bisan og oras nga tingtrabaho aron sa pagpa-areglar sa iyang kaugalingon.

Ang nasaksihan ni Osmeña maoy nakaaghat kaniya nga kinahanglang si Mayor Michael Rama mohimo gyud og mga pamaagi aron di magamit ang mga sakyanan sa City Hall sa personal nga mga lakaw sa mga kawani.

Dili pa dugay, ang Banat News mibulgar nga adunay kotse nga puti sa City Hall nga ang plate number 329 nga kanunay’ng gamiton paghatud-kuha sa mga bata sa tunghaan.

Ang lagda base sa Oplan Red Plate mao nga kadtong mogamit sa mga sakyanan sa kagamhanan pangitaan gyud og trip tickets sa mga tinugyanan sa Ombudsman ug Commission on Audit. Ang tumong niini aron pagsiguro nga ang ilang paggamit sa sakyanan usa ka opisyal nga kalihukan. Nabantayan hinuon nga ang Ombudsman nga maoy gitahasan sa paghimo’g Oplan Red Plate wala na kaayo mohingusog sa kampanya.

Ang Banat Manobela nakadawat usab og report nga mga sakyanan sa City Hall gigamit usab sa matag gabii nga pulong-pulong sa mga politiko nga ipahigayon sa lainlaing barangay.

Ang City Hall sa pagkakaron mihukom nga sugod Septiyembre 1, minusan na ang gasolinang ihatag sa mga sakyanan, apil na kadtong mga sakyanan nga giisyu sa mayor ug mga opisyal.

Matud ni City Administrator Jose Marie Poblete nga binlan na lang og 1/3 ang supply nga gasolina ang mga sakyanan, apan walay labot ang garbage trucks ug mga sakyanan sa Mobile Patrol Group ug mga tanod nga gamiton pagpatrolya.

Gipasabot ni Poblete nga kun karon 300 litros sa usa ka sakyanan matag buwan hatagan na lang kini og 100 ka litros. - BANAT NEWS